Фолксваген, најголемиот европски производител на автомобили, планира да затвори најмалку три фабрики во Германија, да отпушти десетици илјади работници и да го намали капацитетот на преостанатите фабрики во земјата.
Овој драстичен потег доаѓа како дел од поширокото реструктурирање на компанијата, објави во понеделникот претседателката на работниот совет, Даниела Каваљо.
Компанијата со недели преговара со синдикатите за плановите за намалување на трошоците, вклучувајќи ја и можноста за затворање на фабрики во Германија, што би било сериозен удар за индустриската моќ во земјата. Фолксваген во понеделникот ја потврди потребата од реструктурирање, најавувајќи конкретни предлози кои ќе бидат претставени во среда.
Раководството е апсолутно сериозно за овие потези. Ова не е само закана како дел од колективното договарање“, им рече Каваљо на работниците во Фолксваген во Волфсбург, најголемата фабрика на компанијата. Каваљо додаде дека ова е почеток на „продажбата“ на најголемата германска индустриска групација на нејзиниот домашен пазар.
Овие изјави укажуваат на значајна ескалација на конфликтот меѓу работниците и раководството во Фолксваген, кој се соочува со високи трошоци за енергија и работна сила, конкуренција од Азија, намалена побарувачка во Европа и Кина и побавна од очекуваната транзиција кон електрични возила. Каваљо ја повика германската влада да создаде стратегија за спас на германската индустрија.
Раководството на Фолксваген во средата соопшти дека ќе претстави предлози како да се намалат трошоците за работна сила. Во соопштението посочуваат дека состојбата е сериозна и дека „без сеопфатни мерки за враќање на конкурентноста, инвестициите во иднина се неодржливи“.
Членот на управниот одбор на Фолксваген, Гунар Килијан, додаде дека трошоците во германските фабрики се и до 50% повисоки од конкуренцијата. Томас Шефер, шеф на брендот Фолксваген, изјави дека германските погони не се доволно продуктивни.
Проблемите на Фолксваген доаѓаат во време кога другите германски производители на автомобили, како Мерцедес, најавија дополнителни мерки за штедење поради падот на профитот. Порше, кој е во мнозинска сопственост на Фолксваген, го намалува бројот на продажни места во Кина поради слабата побарувачка.
Покрај сите горенаведени предизвици, германските производители на автомобили стравуваат од последиците од трговската војна меѓу ЕУ и Кина, имајќи предвид дека оваа недела треба да стапат на сила високите царини на ЕУ за кинеските електрични возила, пренесува Ројтерс.
