Комитетот на министри на Советот на Европа денеска ја усвои резолуцијата за национални малцинства во Македонија, со која се утврдува дека нема основа за тврдењата на Бугарија за постоење на системска дискриминација врз малцинствата во земјава, објави „Слободен печат“.

По долгата расправа во која беа одбиени сите амандмани на Бугарија, Комитетот на министри во целост ја прифати аргументацијата и ставовите на македонското Министерство за надворешни работи, што се смета за голема извојувана победа на македонската дипломатија.

Бугарската дипломатија во изминатиот период со агресивен пристап се обиде да обезбеди амандманско адаптирање на резолуцијата, што, пак, би претставувало основа за натамошни дипломатски активности кај европските земји.

Денеска усвоената резолуција е подготвена од тим на експерти на Советот на Европа кој во изминатиот период престојуваше во Македонија да ги евалуира тврдењата на Бугарија за постоење на системска дискриминација врз малцинствата.