Шефот на бугарската дипломатија Георг Георгиев во интервју за БТВ, изјави дека на 4 февруари нема да има заедничко одбележување на 153-годишнината од раѓањето на Гоце Делчев, затоа што Бугарија не добила покана од Македонија.
Ако прашањето е зошто нема да има заедничко чествување, тоа е затоа што не сме добиле покана за такво нешто. Последното такво чествување беше откако се потпиша Договорот за добрососедство во 2017 година. Но, во овој момент немаме покана од Македонија заедно да го чествуваме тој ден, рече Георгиев.
Прашан дали со заедничкото одбележување би можеле да повторат тензиите од 2023 година, тој посочи дека „историјата треба да обединува, а не да разделува“.
За односите меѓу Софија и Скопје Георгиев оцени дека се „специфични“.
Одговорајќи на прашањето дали Софија ќе ја промени позицијата, со оглед на ставот на македонскиот премиер Христијан Мицкоски дека Бугарите нема да бидат внесени во Уставот без јасни гаранции од ЕУ, Георгиев рече дека Скопје нема како да го продолжи пристапниот процес доколку не ги исполни преземените обврски.
Тука не зборуваме само за Бугарија и тоа треба јасно да го потенцираме. Таканаречениот „француски предлог“, тоа што се случи за време на 2022 година, е меѓу сите членки на ЕУ и РСМ. Тука зборуваме за обврски што далеку го надминуваат билатералниот спор. Зборуваме за нешто со кое се согласиле сите држави членки на ЕУ и РСМ. Ако обврските не бидат испочитувани, ЕУ нема како да го продолжи патот за присоединување на Македонија, изјави бугарскиот министер за надворешни работи.
Според него, нема држава која повеќе од Бугарија има интерес од интеграцијата на земјите од Западен Балкан и додаде дека тоа не го кажува само од позиција на бугарските европски приоритети од 2018 година со претседателството, туку во многу поширок контекст.
Ние, искрено, се радуваме дека Република Македонија и Албанија се наши сојузници во НАТО. Тоа е инвестиција во безбедноста на регионот. Природно е да се радуваме и на евроинтеграциите, но со запазување на условите, рече Георгиев.
