Коронавирусот, кој се прошири низ светот пред пет години и го блокираше животот во многу земји, потекнува од лабораторија во Вухан, Кина. Ова го пишува германската разузнавачка служба (БНД), а објавија германските и швајцарските медиуми
„БНД поседува јасни докази дека вирусот Сарс-КоВ-2 потекнува од Институтот за вирологија во Вухан“, објавија медиумите.
Според овие тврдења, германската разузнавачка служба во 2020 година имала докази дека коронавирусот се проширил низ градот, а подоцна и низ целиот свет поради „лабораториска несреќа“.
Овој заклучок е донесен по анализата на податоците кои стигнале до германските власти како дел од разузнавачката операција со кодно име „Саремаа“.
Резултатите од истражувањето на БНД ги знаела и тогашната германска канцеларка Ангела Меркел, која според пишувањата на медиумите, меѓу кои и неделникот Ди Цајт, го спречила објавувањето на овие податоци. Нејзиниот наследник Олаф Шолц го направи истото.
Портпаролката на германската влада во средата одби да ги коментира медиумските извештаи, велејќи дека владата јавно не ја коментира работата на тајните служби.
Податоците со кои располага БНД, како што јави швајцарскиот Ноје Цуерихер Цајтунг (НЗЗ), кабинетот на германската канцеларка им ги дал на вештачење на група научници.
Иако официјалните резултати од вештачењето не се објавени, научниците наводно се уште се поделени околу теоријата за потеклото на вирусот.
Експертите велат дека недостасува „конечниот доказ“ дека вирусот потекнува од лабораторија. Добар дел од нив веруваат дека вирусот се пренесувал од животни на луѓе на фарми.
„Кинеските научници имаат механизми да обезбедат докази дека вирусот навистина потекнува од природно потекло, но досега немаат објавено ниту една студија што би го докажувала тоа“, рече еден од најпознатите германски виролози, Кристијан Дростен, коментирајќи ги најновите медиумски извештаи.
