Еврокомесарката за проширување Марта Кос испрати силна порака од Скопје во одбрана на македонскиот идентитет, нагласувајќи дека тој не смее да биде предмет на политичко одлучување.
На заедничката прес-конференција со премиерот Христијан Мицкоски, Кос истакна дека идентитетот не се решава на маса за преговори, туку се носи во „душата и срцето“.
„Идентитет е и манастирите, и погачата, и тавче-гравче, пинџурот, полнетите пиперки… тоа никој не може да ви го одземе. ЕУ е заедница на различности и токму преку членството во ЕУ се заштитува идентитетот, културата и јазикот“, рече Кос, додавајќи дека и Словенија, како мала земја, по влезот во ЕУ успеала да го зачува својот јазик како еден од официјалните во Унијата.
Изјавата доаѓа во контекст на најновото барање на Бугарија, во извештајот на Европската комисија да се внесе формулацијата „модерен македонски јазик“.
Премиерот Христијан Мицкоски, пак, подвлече дека идентитетот не може да се сведе само на гастрономија и традиција, туку и на историските личности и настани.
„За мене идентитетот се Гоце Делчев, Кузман Шапкарев, браќата Миладиновци, Илинденското востание, Дамјан Груев, Јане Сандански… Не сум сигурен дека колегите од исток ќе го споделат ова гледање, но тоа се луѓето што го градат нашиот македонски идентитет“, рече Мицкоски.
Состанокот ЕУ – Западен Балкан во Скопје се одржува во критичен момент за проширувањето и во време кога прашањето за македонскиот идентитет повторно станува дел од политичките дебати во Брисел.
