Тетовецот Назиф Дестани, кој на македонската јавност ѝ е познат како сопственик на фирмата „Еколог“, ги продал акциите во рударската компанија „Еуромакс Рисорсес“, која подолг период форсира проект за отворање на рудник за бакар и злато кај месноста Иловица во струмичко, објави „Дома“.
Холандската компанија „НДХ БВ“ (NDX BV), која е дел од групацијата „НД Груп“ чиј основач е Дестани, пред десетина дена за 3,2 милиони долари ѝ ги продала акциите што ги поседуваше во „Еуромакс“ на компанијата „ВВВ Комодитис енд Рисорсес“ (VVV Commodities and Resources), пренесе „Globe News Wire“. Ова е забележано и на веб-страницата на „Еуромакс“, каде компанијата на Дестани веќе не е фигурира во акционерската структура.
Дестани се повлекол од „Еуромакс“, откако преку неговата холандска фирма во јануари 2023 година вложи приближно иста сум од три милиони долари во акции на канадската компанија. Само две недели откако Дестани ги купи акциите, Вишиот управен суд одлучи да ја уважи жалбата на „Еуромакс“, кој долго и упорно се жалеше во македонските судови на одлуката на Владата да го раскине договорот за една од концесиите за експлоатација на руда во струмичко.
Активистите од здружението „Здрава котлина“, кои се борат против отворање на рудникот „Иловица“ се сомневаат дека не е случајно тоа што судот донел одлука во корист на „Еуромакс“ само две недели откако Дестани преку холандската фирма станал еден од поголемите акционери во канадската компанија. Според нив, Дестан, како човек близок до тогаш владејачката ДУИ, ги користел политичките врски за да го протурка проектот што може да предизвика еколошка катастрофа во струмичко. Активистите го поткрепуваат ова сомневање со фактот дека еден од судиите кој одлучувал по последната жалба на „Еуромакс“ е Субхи Јакупи, поранешен член на Државната изборна комисија номиниран од ДУИ.
Одлуката на тогашната влада за спојување на концесиите за рудникот „Иловица – Штука“ во Струмичката котлина пред две години го „стресе“ кабинетот на поранешниот премиер Димитар Ковачевски, откако на површина излезе некоординираноста на министрите, но, се отвори и прашањето за почитувањето на деловникот за работа на Владата и можната неодговорност на функционерите, пишува „Дома“.
Седницата од 27 јуни 2023 година за малку ќе поминеше незабележано доколку не беше објавата во „Службен весник“ дека е донесена одлука за спојување на двете концесии на „Еуромакс Рисорсес“, точка дополнително ставена на дневниот ред на предлог на тогашниот министер за економија Крешник Бектеши, која предизвика и реакции од негови колеги дека одлучувале без да ги имаат сите информации. Ова невообичаено тврдење го отвори сомнежот дали воопшто е почитуван Деловникот за работа на Владата, во кој точно се наведени процедурите и филтрите кои треба да се поминат пред министрите да гласаат за некоја одлука.
