Под мотото „Забрането дишење“, в сабота (1 февруари) низ главните улици во Струмица ќе се одржи протестен марш поради загадувањето на воздухот, информираат од Еколошкото здружение „Здрава котлина“.
Оттаму велат дека протестниот марш во Струмица е израз на граѓанското незадоволство од енормното загадување на воздухот.
„На 1 февруари (сабота) со почеток во 11 часот ќе одржиме протестен марш низ улиците на Струмица како израз на граѓанско незадоволство од упорното нерешавање на проблемот со воздушното загадување во Струмичката Котлина, со што ја искачи Струмица на 7. место на најзагаден град во Европа“,пишува во поканата за маршот на „Здрава котлина“.
Ги информираат Струмичани дека маршот ќе почне од паркот кај Домот на АРМ, а оттаму ќе продолжи по улиците „24 Октомври“ и „Младинка“ до кружниот тек кај трговскиот центар „Мавровка“. Потоа продолжува по улицата „Гоце Делчев“ до кружниот тек кај Поштата кон булеварот „Гоце Делчев“ до раскрсницата кај „Глобал“. Од булеварот „Ленинова“, покрај Основниот суд, маршот ќе заврши пред зградата на Општина Струмица кај канцелариите на инспекциските служби.
„Таму ќе се обратиме на јавноста за нашите пораки и барања до локалната и централната власт. Ќе ги посочиме нештата што мора да се променат и во името на сите вас ќе искажеме конкретни и прецизни мерки од кои ќе нема отстапување“,велат од еколошкото здружение.
Според „Здрава котлина“, пресудно е да се врши јавен притисок во отсуство на резултати што со години се чекаат.
„Ова е исклучиво граѓански протест и секое јавно истакнато обележје или симбол ќе биде отстранет од страна на редарите“,пишува во соопштението на екологистите.
Оваа иницијатива доаѓа откако изминатите денови е надминат прагот на штетните ПМ 10 честички во Струмица, по што во сила стапија препораките на Министерството за животна средина и просторно планирање.
Резултатите од истражувањето на лабораторијата при Универзитетот „Гоце Делчев“ во Штип велат дека најголемо учество во загадувањето на воздухот во Општина Струмица има согорувањето на биомасата, која на годишно ниво изнесува 35 отсто и која во зимскиот период ги надминува дозволените граници. Втор извор на загадувањето е сообраќајот.
