Американскиот производител на електрични автомобили минува низ оваа ситуација поради политичките изјави на својот шеф Илон Маск.
Неодамнешните изјави на Илон Маск ја налутија јавноста ширум Европа. Тоа негативно се одразува на брендот Tesla, кој се соочува со голем пад на продажбата и континуиран пад на цената на акциите.
По првите два месеци од 2025 година, Tesla пријави пад на европскиот пазар од дури 44 отсто во споредба со истиот период минатата година. Од почетокот на годината до крајот на февруари, американската марка продаде само 25.852 автомобили на Стариот континент. Споредувајќи ја таа бројка со 46.000 продадени единици минатата година, Tesla има причина да се грижи.
Во јануари, европската продажба на Tesla падна за 45 отсто во споредба со истиот период минатата година. Не беше ништо подобро во февруари, кога продажбата во Европа падна за 44 отсто, покажуваат новите податоци на Dataforce.
Најголем пад ширум континентот е забележан во Германија, каде продажбата падна за 76 отсто минатиот месец. Неодамнешните изјави на Илон Маск, како и неговата поддршка за екстремно десничарските политичари во неколку европски земји, доведоа до протести и бојкот на продажбата. Неодамна, неколку салони на Tesla ширум светот беа вандализирани, а во некои случаи дури и беа запалени автомобилите на марката.
