Може да се претпостави дека луѓето кои се подготвени да платат мало богатство за Ферари, исто така, ќе инвестираат добри пари за негова заштита и безбедност, односно технологија против кражба. Се чини дека тоа не било случај со еден човек од Вотербери (град во американската сојузна држава Конектикат) чие скапо Ferrari 812 GTS вредно дури 575 илјади долари е украдено. Во полицискиот извештај не е наведено како бил украден автомобилот, но затоа се споменува како е пронајден.
Во фаќањето на крадецот не помогнала софистицирана технологија, туку – слушалките на Apple. Имено, сопственикот на автомобилот ги оставил своите AirPods на совозачкото седиште, а благодарение на апликацијата Find My на Apple за пронаоѓање изгубени уреди со помош на Mac или iPhone, сопственикот на Ferrari успеал да ги лоцира слушалките, а со тоа и неговиот автомобил. Оваа информација веднаш ја проследил до полицијата која набрзо успеала да ги пронајде автомобилот и крадецот.
Кога полицијата го запрела крадецот на бензинската пумпа, тој со ферарито удрил во нивниот автомобил по што побегнал и го оставил телефонот во автомобилот. Не е познато дали ги нашол слушалките на предното седиште од возилото, но и да ги нашол, сигурно не можел да помисли дека можат да ја откријат локацијата, односно дека полицијата може да ги искористи за да го пронајде автомобилот.
Полицијата успеала да добие податоци од телефонот на крадецот и открила дека се работи за 22-годишен маж кој веќе е познат по кражба на автомобили.
Инаку, американската полиција претходно ги советуваше возачите да користат уреди како AirTag, уред на Apple кој овозможува следење на локацијата. Добро е да се стави на пр. на клучеви, во паричници, патни торби, автомобили и слично за да можат полесно да се најдат во случај на загуба. Следењето локација не бара интернет конекција, наместо тоа се поврзува со блиските уреди на Apple за да испрати сигнал за нејзината локација.
