Во примероците на таканаречената Дубаи чоколадо, увезени во Германија, пронајдени се многу штетни состојки, соопшти во четвртокот Министерството за потрошувачка на сојузната покраина Баден-Виртемберг.
„Од случаи на измами до опасности по здравјето, во првтие испитувања на дубаиската чоколада од увоз е пронајдено речиси сѐ“, рече министерот за заштита на потрошувачите на Баден-Виртемберг, Петер Хаук.
Во сите осум испитувања што ги испитувало покраинското Биро за хемиски и ветеринарни истражувања, беа пронајдени загадувања, алергени, вештачки бои и маснотија која нее како путерот од какао, единствената маст дозволена во чоколадата.
„Поради малиот број примероци, не можеме да зборуваме за тренд, но наодите се многу загрижувачки и нѐ поттикнаа да спроведеме пообемно тестирање“, рече Хаук.
Кај испитуваните Дубаи чоколада станува збор за производи увезени од Обединетите Арапски Емирати и од Турција.
Во некои чоколада е пронајден сусам, иако не бил деклариран на амбалажата, а во некои и палмино масло, коешто, исто така, не било декларирано како состојка во чоколадата.
Според анализата, чоколадата од Обединетите Арапски Емирати била контаминирана во текот на процесот на производство до таа мера што е непогодна за човечка исхрана.
Кај сите чоколада е пронајдено зголемено количество вештачки бои кои „сугерираат поголем процент на квалитетни состојки од вистинските“, односно кремот од ф’стаци.
Дубаи чоколадата е голем хит во Германија последните месеци и е еден од најпопуларните прехранбени производи на божикните базари.
