Познатиот бизнисмен и екс-министер за финансии, Борис Стојменов сподели со јавноста дека поради неговите синови, фамилијарната компанија „БС“ е оштетена за повеќе од 30 милиони евра. Но, не поради корупција, туку поради непознавање на законите, нагласува тој.
-Дали Република Македонија може да работи и функционира како правна држава? Одговорот на горното прашање го бараме низ фамилијата како основна клетка на државата, затоа што правната држава мора да функционира и во фамилијата. Како пример ја земам мојата фамилија заедно со синовите и случувањата во истата од аспект на владеењето на правната држава или конкретно моите синови Емил и Марјан Стојменов ја ограбиле компанијата БС чијшто сопственик и основач сум јас со мојата сопруга (покојна) иако компанијата по сите правни норми им припаѓа ним, стои во објавата на Стојменов.
Тој тврди дека причините за грабежот е непознавање на законите кои ја регулираат таа материја (поделба на имотот), како што се законот за наследување и законот за трговските друштва.
-Проблемот ќе се решел ако државата преку своите институции постапила според законите врз основа на кои работат институциите.
Конкретно, во овој грабеж е вмешан Централниот регистар на Република Северна Македонија бидејќи оваа институција е овластена за оваа проблематика. Централниот регистар злоупотребувајќи ги своите овластувања кои произлегуваат од законот за трговски друштва погрешно го применил законот и директно од не знаење го дозволил, дал согласност и го одобрил овој грабеж. Во случајот немало корупција, меѓутоа направена е штета во износ од над 30 милиони евра со неприменување на законот за трговски друштва што не го ослободува од одговорност централниот регистар, посочува бизнисменот.
Како што вели, според негови сознанија има многу такви случаеви особено за домашните фирми, а не за странските фирми.
-Управата за јавни приходи учествува во овој грабеж, а причината е незнаење, а не корупција. На сите учесници во овој грабеж и рушење на правната држава, наша мила Македонија ќе им бидат поднесени соодветни кривични пријави од основна причина да допринесеме да владее правна држава, стои во објавата на Стојменов.
