Владејачката коалиција ВЛЕН изрази жалење за пристапот што министерката за образование Весна Јаневска го имаше за време на вчерашниот јавен настап во Тетово. Одговарајќи на новинарски прашања со тетовскиот градоначалник Билал Касами пред панел-дискусија во Тетово, таа неколкупати му сугерираше да зборува на македонски јазик за, како што кажа, да може да разберат и оние кои не знаат добро албански јазик.
Од ВЛЕН оценија дека потегот на Јаневска е спротивен на духот на почитување и соживот што треба да го отелотворува секој претставник на државните институции и ѝ порачаа на министерката дека непознавањето на албанскиот јазик не треба да води до фрустрација.
„Наместо да се чувствува лошо што додека Касами зборува македонски и албански, таа, и покрај тоа што живее во повеќејазична средина не знае ниту еден збор на албански, министерката Јаневска реагираше зашто не разбира албански јазик. Во едно демократско и мултиетничко општество, кога дури и странски дипломати кои престојуваат во нашата земја учат зборови на албански, да бидеш министер, па дури и министер за образование, а да не знаеш ниту еден збор од јазикот на сограѓаните Албанци и да реагираш на употребата на албанскиот јазик, е тешко да се преведе во услови на коегзистенција, граѓанство и почитување на другите во едно мултијазично општество“,порачаа од ВЛЕН, додавајќи дека почитувањето на јазиците што се говорат во земјава е почитување на граѓаните и на самата држава во која тие се обединети.
Настанот за кој реагираат од ВЛЕН се случи пред вчерашната панел-дискусија во Тетово во рамките на кампањата на МОН, „Магијата е во знаењето“, кога Јаневска и тетовскиот градоначалник Билал Касами даваа изјава за медиумите.
„Ве молам, градоначалник, накратко само, за да разбереме и ние кои не знаеме добро албански… Извинете, накратко само кажете ни што зборувавте ве молам, ве молам“,рече Јаневска обраќајќи му се на Касами, кој одговараше новинарски прашања на албански јазик.
„Да завршам на албански и ќе кажам и на македонски“,ѝ возврати тетовскиот градоначалник.
„А, добро, во ред, фала ви“,рече Јаневска.
