Амазонското племе Марубо поднесе тужба против американскиот весник „Њујорк тајмс“ поради извештај во кој се вели дека племето станало зависно од порнографија, откако добило пристап до побрз интернет.
Според претставниците на оваа амазонска заедница, извештај од угледен весник довел до тоа нивните членови јавно да бидат етикетирани како зависници од порнографија, објавува Би-Би-Си.
Во тужбата, која се поднесува за наводна клевета, се наведува дека статијата во американскиот весник го прикажува племето Марубо како неспособно да се справи со основната употреба на интернет и дека конкретно го истакнува „наводот дека младите од племето се преокупирани со порнографија“.
Медиумите TMZ и Yahoo се именувани како обвинети. Во тужбата се тврди дека нивните статии ги исмејувале младите членови на племето и ги искривувале неговите традиции.
Тие бараат отштета од 180 милиони долари
„Њујорк тајмс“ соопшти дека нивниот извештај не тврди дека членовите на племето се зависни од порнографија и дека ќе се бранат од обвиненијата.
Домородната заедница Марубо, која има околу 2.000 членови, бара најмалку 180 милиони долари отштета.
Во контроверзниот извештај на NYT, објавен девет месеци откако племето Марубо доби пристап до Starlink, се вели дека племето „веќе се соочува со истите проблеми што ги мачат американските домаќинства со години“. Според текстот, тие проблеми вклучуваат „тинејџери залепени за мобилни телефони“, насилни видео игри и малолетници кои гледаат порнографија.
Племенскиот водач, кој е критичен кон интернетот, е особено загрижен за порнографијата. Во овој поглед, во текстот се споменува дека забележал „поагресивно сексуално однесување“ кај младите мажи во заедницата. Статијата, исто така, ги истакнува позитивните аспекти на интернетот што племето ги препознава, вклучително и можноста за контактирање со властите во врска со здравствени проблеми или уништување на животната средина.
Понижување и нарушен углед
Во тужбата, исто така, се тврди дека други медиуми го објавиле и дополнително погрешно го претставиле извештајот на NYT, вклучувајќи го и насловот на TMZ кој директно сугерирал зависност од порнографија.
Реакцијата на статијата доведе до тоа NYT да објави продолжение околу седум дена по објавувањето на првиот текст под наслов: „Не, оддалечено амазонско племе не станало зависно од порнографија“. Во додатокот се вели дека повеќе од 100 веб-страници низ целиот свет објавиле наслови во кои лажно се тврди дека членовите на племето Марубо станале зависни од порнографија.
Тужителите, лидерот на заедницата Енок Марубо и бразилската активистка Флора Дутра, кои му помогнале на племето да дистрибуира 20 антени Starlink во вредност од 15.000 долари, рекоа дека статијата на NYT предизвикала „глобална медиумска бура“. Според нив, ова ги изложило на „понижување, вознемирување и непоправлива штета на нивниот углед и безбедност“.
Статијата на TMZ содржела видеа од Маруб и Дутра како ги дистрибуираат антените, за кои тврдат дека создале лажен впечаток дека тие внеле штетна, сексуално експлицитна содржина во заедницата и придонеле за наводно морално и социјално распаѓање.
