Компанијата за здравствено осигурување „ЈунајтедХелткер“, која е една од најголемите американски компании и е дел од индексот на индустрискиот просек на берзата „Дау Џонс“, одеднаш е во голема криза.
Кулминацијата на кризата дојде претходно оваа недела, кога Ендру Вити поднесе оставка од функцијата извршен директор на „ЈунајтедХелткер“ од „лични причини“. Компанијата набргу потоа ги напушти своите финансиски насоки, наведувајќи ги како причина брзо растечките медицински трошоци.
Сепак, „Волстрит џурнал“ објави дека „ЈунајтедХелткер“ е под истрага на федералните обвинители поради сомнение за измама на федералната здравствена агенција „Медикер“. „ЈунајтедХелткер“ соопшти дека немаат информации дека е во тек истрага. Ова е нешто што ги запрепасти инвеститорите во оваа компанија, предизвикувајќи значително намалување на нивната доверба во неа. Ова се одрази во намалување на вредноста на акциите на „ЈунајтедХелткер“ за огромни 288 милијарди долари, и тоа за само еден месец. Вчера, цената на акциите беше најниска од април 2020 година, кога имаше пандемија на коронавирус.
Си-Ен-Ен пишува дека ова е спектакуларен пресврт за една од најмоќните американски компании и најголемата американска компанија за здравствено осигурување. Сето ова се случува шест месеци откако младиот Луиџи Манџоне го уби тогашниот извршен директор на „ЈунајтедХелткер“, Брајан Томпсон, во Њујорк. Убиството го привлече вниманието на светската јавност, особено на оние кои се незадоволни од здравственото осигурување.
