Германската министерка за економија, Катерина Рајхе, ги повика Германците да работат понапорно и подолго – доколку е потребно дури и до 70-годишна возраст. Тоа предизвика бројни контроверзии, објавува ДВ. Потпретседателката на Клубот на претставници на СПД во Бундестагот, Дагмар Шмит, го нарече тој предлог „далеку од реалноста на животот на повеќето луѓе“. „
Веќе сега се исплати да се работи по законската возраст за пензионирање – за сите оние кои го сакаат тоа“, изјави таа за медиумите на групацијата Функе и додаде: „Мора да ги заштитиме оние кои не можат. За нив, секое продолжување на работниот век би претставувало намалување на пензијата. Тоа нема да се случи со СПД“.
Аргументот дека вработените во Германија треба да работат подолго затоа што живеат подолго не може да се сфати толку лесно, додаде Шмит. „Првенствено, луѓето со повисоки приходи живеат подолго. Повторно, погрешните групи би биле погодени“.
Во интервју за „Франкфуртер алгемајне цајтунг“ во саботата, министерката изјави дека работниот век мора да се продолжи. Демографските промени и зголемувањето на очекуваниот животен век го прават тоа „неизбежно“.
Критика кон коалицискиот партнер
И Себастијан Ролоф, портпарол на СПД за економски прашања, смета дека предлогот на министерката Рајхе е погрешен.
„Аргументот на г-ѓа Рајхе е многу едноставен и не одговара на реалната ситуација“, изјави Ролоф за политичкото списание „Шпигел“.
Точно е дека на Германија ѝ е потребна повеќе работна сила, „но ова не може да се реши директно со зголемување на возраста за пензионирање“.
Според „Шпигел“, Ролоф е за имиграција на квалификувани работници и би сакал да ги мотивира постарите вработени да останат на работа подолго со бенефиции, а не со принуда. Тој ги наведува даночните олеснувања и пофлексибилното пензионирање како можни мерки – ова се плановите на поранешната таканаречена семафор-коалиција од минатата есен.
Шефот на Левичарската партија, Серен Пелман, за „Шпигел“ изјави дека станува збор за „евтина класна борба од горе“. Многу вработени би можеле да ги сфатат овие изјави како остри потсмевања, рече Пелман.
„Многу вработени работат прекувремено, се разболуваат поради прекумерно преоптоварување, а многумина веќе сега, по живот исполнет со работа, чекаат горчлива сиромаштија во староста“.
Наместо да се принудуваат луѓето да работат подолго, пензискиот систем треба да се финансира така што сите вработени ќе плаќаат во него. Потребна е и подобра грижа за децата, за родителите да можат да се олеснат и да се посветат на работа во мир.
Федерацијата на средни претпријатија, исто така, реагираше воздржано на овој предлог. Зголемувањето на продуктивноста е поважно, изјави за весникот на медиумската група Функе, извршниот директор на здружението, Кристоф Алхаус.
„Намалете ги деловните даноци и придонесите за социјално осигурување – и скратете ја непотребната бирократија“. Тоа би ѝ помогнало на германската економија повеќе од „парализирачката расправија во владејачката коалиција околу продолжувањето на работниот век“, наведува Алхаус.
