Васил Јованов, осомничен за кривично дело „тешки дела против безбедноста на луѓето и имотот во сообраќајот“ за сообраќајката од јануари годинава на Булеварот „Партизански одреди“ во Скопје во која животот го загуби Фросина Кулакова, денеска пред Основниот кривичен суд Скопје призна вина за делото.
Обвинетиот Васил Јованов, кој е редовен студент и беше спроведен од затворски притвор, пред Судот рече дека го разбира делото за кое е обвинет и призна вина.
– Најпрво сакам да изразам најдлабоко сочувство на целото семејство и да се извинам за тоа што сум го сторил. Никогаш не сум можел ниту да помислам за вакво нешто. За вината, да судија виновен сум, рече Јованов.
Во судница, присутни беа родителите и сестрата на трагично починатата Фросина, како и родителите на обвинетиот Васил.
Јавниот обвинител Александар Марковски, во воведниот говор рече дека во овој случај не станува збор за обична сообраќајка, не поради медиумската помпа, туку поради фактот на начинот на кој е сторена, во смисла на големиот број направени сообраќајни пропусти на сторителот и трагично загубениот живот на младата Фросина.
– Овие околности доведоа обвинението да се сублимира во најтешкиот облик. За да се докаже, прибавени се четири вештачења, меѓу кои и особено податливо сообраќајно техничко, осум сведоци и други материјални докази, меѓу кои и известувања за други сообраќајни прекршоци, изјави Марковски.
Обвинителот, исто така, укажа на новонастаната ситуација по поднесување на обвинението, посочувајќи дека обвинетиот бил правосилно осуден, за што достави примерок од потврда од судот од 7 мај 2025 година.
-Обвинителството ќе се обиде да докаже дека обвинетиот нецела минута пред настанот сторил и други прекршоци како цик-цак возење, преминување преку две ленти, но истите не се релевантни од кривично правна смисла за настаната штета, но се релевантни со цел за докажување на умислата, рече обвинителот.
Обвинителот, најави дека потребно е прецизирање на втората страна од обвинението, во една одредба, наместо член 317, став 1, да стои член 225, став 1 од Закон за безбедност на сообраќајот, нагласувајќи дека ова е неопходно зошто духот на законот налага да се прави дистинкција кога има возачка ама не ја поседува, од ситуација кога воопшто нема возачка за Б категорија.
Адвокатот на оштетените Дарко Ал Блана, преднајави имотно правно оштетување и дека се приклучуваат во кривичното гонење.
Мајката на Фросина, Камелија Кулакова, рече дека не е само мајка што го изгубила своето дете, туку човек со откорната душа. – Денеска сум гласот на Фросина, бидејќи таа не може да зборува. Кажете ми кој збор од законот може да го опише ова и да ја опише болката што ја имам. Ова не е судење за сообраќајка, ова е судење за грабежна живот и иднина. Барам највисока казна не за одмазда, туку за правда, рече таа.
Бранителот на Васил Јованов, адвокат Сашко Дуковски, пред судот побара да се оттргне, како што рече, една голема невистини за сега обвинетиот Васил, дека е наркоман, нагласувајќи дека тој е спортист.
– Васил е спортист и за тоа доставувам потврда за членство во бокс клуб, освоени медали и благодарници. Доставувам и потврда од ракометната федерација дека Васил е лиценциран играч за РК Пролет 62 за сезона 2021-22 година, изјави Дуковски.
Дуковски, исто така, нагласи дека не го спорат присуството на алкохол во крвта, но дека во вештачењата нема никакво присуство на дрога. – Тоа судот може да го утврди во направените вештачења, рече Дуковски.
Судијката Снежана Марковска, на почетокот на денешното рочиште информираше дека поради неуредна покана шест сведоци не се присутни.
Според обвинението, на 29 јануари 2025 година, Васил Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на лице место. За делото за кое се товари Јованов е предвидена затворска казна до 20 години.
Во меѓувреме, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.
Обвинението се однесува на периодот од 04.11.2022 до 30.01.2025 година, во кој Зоран Јованов дозволувал на својот син Васил Јованов да управува патничко моторно возило „Пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.
