Минситерката за финансии Гордана Димитриеска-Кочоска очекува дека политиките што ги спроведува новата Влада на крајот на оваа година да донесат подобри резултати и посилна економија.
На својот ФБ профил вели дека крајот на годината и почетокот на Новата е време кога гледаме зад нас што сме направиле и на што сме ја потрошиле нашата енергија и какви очекувања имаме за Новата година.
Испративме година во која се соочивме со многу предизвици. Во првата половина од годината нашата енергија беше насочена да ја добиеме можноста за справување со предизвиците, додека во втората половина почна и практичната работа на терен – детектирање на реалната состојба и преземање конкретни мерки за нивно надминување. Дел се зад нас, за дел се поставени основите за решавање, но секако претстои многу работа пред нас, затоа што решавме прашања на кои не се работело со децении“, вели министерката.
Таа во објавата преку бројки ја претставува годината што ја испраќаме. „Намалена невработеноста на 12,3 %, растот на економијата во третиот квартал достигна 3%. Буџетот се реализира согласно планираното, стабилен е и одржлив. Приходите бележат раст над 10%, и тоа во услови на стабилизирана инфлација и инфалција која од двоцифрена во минатата година се сведе на околу 3,5%. Расходите се во рамки на планираното, како и дефицитот. Јавниот долг се управува преку навремено сервисирање на обврските и обезбедување на потребните средства по најоптимални услови на пазарот. Капиталните инвестиции се приоритет на кој ќе работиме во наредната година и на крајот на годината да споделиме позитивни резултати“, стои во објавата.
Во неа додава дека изминати се само шест месеци од промената на политиките што ги спроведува новата Влада, дека беше потребна многу енергија за да се постави основата и дека се уште има многу енергија која ќе се вложи за постигнување на целта.
„Инвестициите се основата на нашиот концепт за развој. Веруваме во неговата реализација и во бенефитот што ќе го донесе за сите. Тие се основата за поразвиена економија и посилни и поконкурентни компании, повеќе приходи во буџетот, подобри услуги кои се финансираат од парите на граѓаните – образование, здравство, социјални услуги, инфраструктура и слично. Тоа ќе значи подобар стандард за граѓаните и повисоки плати и повисоки пензии. Во новата година влегуваме со голема посветеност за остварување и градење општество во кое ќе обезбедиме благосостојба за сите граѓани“, наведува министерката за финансии.
Во Новата година на сите посакува да донесе здравје, среќа и просперитет. „Ви посакувам среќни празници и бериќетна година. Понесете позитивна енергија, многу љубов и секогаш со вас носете ја надежта за подобро утре“, порачува министерката честитајќи ги празниците.
