Храбар патник успеал да совлада човек кој извикувал во авионот дека има бомба. Инцидентот се случил вчера на лет на easyJet од Лутон до Глазгов.
Драматичен инцидент што се случи во утринските часови, доведе до принудно слетување на преполн авион на аеродромот во Глазгов.
Напаѓачот потоа беше врзан со лисици и шест полицајци го извлекоа од авионот, додека преплашените патници останаа во солзи.
На видеото се слуша како напаѓачот вели: „Сакав да му испратам порака на Трамп… тој е во Шкотска“.
Американскиот претседател моментално е во посета на таа земја и бил виден како игра голф за време на викендот.
Еден очевидец рекол дека одеднаш се разбудил околу 8 часот наутро, помалку од еден час по полетувањето од Лутон, кога еден човек излегол од тоалетот на задниот дел од авионот и почнал да прави врева.
„Излезе од тоалетот викајќи: „Алаху Акбар“ со рацете кренати над главата. Потоа рече: „Имам бомба, имам бомба“ – во тој момент луѓето беа збунети. Мислев дека се шегува, мислам, тоа е чудна шега“, рече патникот.
Тој рече дека човекот ги турнал вработените во авиокомпанијата и се однесувал агресивно кон нив.
„Кога ги турна, тогаш сè се промени. Во тој момент, еден човек успеа да го зграби и да го собори на подот, а потоа сите скокнаа врз него. Се бореа малку на подот, но тогаш веќе знаееше дека згрешил“, рече патникот.
„Пилотот објави дека ќе направи итно слетување и многу брзо го спушти авионот. Некои патници плачеа затоа што беа потресени. Сè беше малку нереално“, додал тој.
