Сегашните решенија за промена на забите се инванзивни и честопати не успеваат целосно да ја обноват природната форма и функција на забот.
Според извештај на Би-Би-Си, група научници од Кингс колеџот во Лондон за првпат успешно одгледаа човечки заби во лабораторија. Овој револуционерен подвиг би можел да направи пресврт во грижата за забите ширум светот, т.е. да им помогне на пациентите кои ги изгубиле забите нудејќи алтернатива за пломбите или забните импланти.
Тимот истражувачи од Кингс колеџот, во соработка со Империјал колеџот во Лондон, успеал да развие материјал што ја имитира околината потребна за развој на забите. Всушност, една клетка во лабораториски услови може да ѝ пренесе информација на друга клетка да почне да се трансформира во забна клетка.
Додека многу животински видови можат да ги регенерираат своите заби, луѓето имаат само една шанса за тоа. Сегашните решенија за замена, вклучувајќи ги вилиците, фиксните протези и забните импланти, се инвазивни и честопати не успеваат целосно да ја вратат природната форма и функција на забот.
„Овој метод користи клетки, биоматеријали и фактори за да поттикне раст и да создаде забни структури што ги имитираат карактеристиките и функциите на природните заби“, се истакнува во студијата.
„Целта на регенеративната стоматологија е биоинженерингот на цел заб, што бара копирање на интеракциите помеѓу забниот епител и мезенхимот (зародично сврзно ткиво).“
Губењето на забите е распространет здравствен проблем што засега милиони луѓе ширум светот, предизвикан од различни фактори. Освен што го нарушува џвакањето и говорот, губењето на забите предизвикува и естетски и психолошки проблеми.
„Оваа идеја за замена на забот на биолошки начин со негово повторно растење ме одведе во Лондон на Кингс колеџот. Одгледувајќи заб во сад, ние навистина ги пополнуваме празнините во знаењето“, изјавила д-р Ана Ангелова-Волпони, учесник во студијата.
Следен предизвик
Сјуечен Жанг, докторант во последната година на Факултетот за стоматологија, орални и краниофацијални науки, изјавил дека забите одгледани лабораториски природно ќе се регенерираат и ќе се интегрираат во вилицата како вистински заби. Новите заби би биле посилни, долготрајни и без ризик од отфрлање, „нудејќи потрајно и биолошки компатибилно решение во однос на пломбите или имплантите“.
И покрај тоа што научниците ја создадоа потребната средина за одгледување заб, следниот предизвик е да се пронајде начин од лабораторијата да го постават забот во усната шуплина на пациентот.
„Имаме различни идеи за поставување на забите во устата. Можеме да ги трансплантираме младите забни клетки на местото каде што недостасува забот и да ги оставиме да растат во устата“, изјавил Сјучен Жанг.
Без разлика каков процес ќе изберат научниците, сепак тоа може да потрае со години. Сепак, овој пробив започнува нова ера во стоматолошката нега.
