Со исказ на обвинетиот Влатко Кешишев, денеска продолжи судењето за грабнувањата и убиствата на Панче Жежовски и Вања Ѓорчевска. Адвокатот на Кешишев најпрво побара да биде отстранет Љупчо Палевски – Палчо од судница, со што Судот го прифати неговото барање, и покрај противењето на Палевски и на неговиот адвокат Страшевски.
Кешишев одговораше на прашање од својот адвокат Дејан Ефремов.
Ефремов: Дали се познаваш со обвинетите, и од кога?
Кешишев: Се познавам со сите, ги запознав во Опера Хаус во 2021 октомври. Кога се вратив од Хрватска со еден штипски сопартиец зборевме за тогаш беше движење ТРЕТА, не беше ДЕСНА. Требаше да готвам за децата кои беа преку патот, бидејќи најавуваа дека ќе има карантин после короната. Палчо го запознав на протестот во Скопје, а повеќе се запознавме во хотелот во Опера Хаус, таму ги запознав и Велибор и Боре.
Ефремов: Дали го познаваш обвинетиот Александар Ѓорчевски?
Кешишев: Прв пат го видов овде во судница.
Ефремов: Кои беа твои обврски во партијата и кој ти ги даваше работните задачи?
Кешишев: Мои обврски беа да готвам колку што има потреба и да ги пречекувам луѓето кои ќе доаѓаат и ќе даваат поддршка за партијата.
Ефремов: Дали во тој период сте биле вработени некаде или ви било плаќано од партијата?
Кешишев: Само што се вратив од Хрватска после 10 дена отидов таму во Опера Хаус. Не примав плата и не се жалам, бидејќи требаше да се формира партија.
Ефремов: Дали ги познаваш Панче Жежовси и Вања Ѓорчевска?
Кешишев: Не, ги видов на Фејсбук, а претходно ги немам видено.
Ефремов: Кога ги видовте на Фејсбук?
Кешишев: Кога беше објавено за Панче за него и за автомобилот, кога се се заврши. И кога се вратив во штабот имам навика да отворам Фејсбук, јас тогаш видов.
Ефремов: Дали имаш учествувано во копање на дупка кај Велес?
Кешишев: Да
Ефремов: Во кој период?
Кешишев: 2022 година во недела, дојде Велибор, во работно одело, бевме сами јас и Палчо. Тогаш Палчо ми рече да одам на Вељо да му помогнам. Јас го послушав отидовме заедно со Вељо кај местото Рудник. Таму извадив копач и почнавме да копаме. Вељо го обележа кругот и почнавме да копаме. Не зборувавме ништо, само тој копаше, јас ја фрлав земјата надвор. Во прво време помислив дека бараме злато, бидејќи не ми беше кажано ништо, така копавме, па се стемни, па се вративме назад. Следната недела повторно. Се се случуваше во недела, тогаш беше слободен Вељо, па пак отидовме и пак без зборови копавме.
Ефремов: Дали ставивте нешто друго во дупката или стоеше празна дупка?
Кешишев: Мислам дека после тоа Вељо беше и направи анкер со алка.
Ефремов: Кое време беше ископана дупката?
Кешишев: Од 2022 година се додека не се случи настанот со Панче.
Ефремов: Дали имавте присуствувано на разговори меѓу сообвинетите неповрзани со партиски активности?
Кешишев: Да, ги слушав, разговараа за грабнувае. На почетокот мислев дека имаат сериозна намера, ама поминаа две години и тоа го сфатив како нивна фантазија. Потоа мене ме бараа за работа, но Палчо не ме пушташе ми рече дека му требам него. После донесе и куче, и требаше да се грижам и за него. Така немаше замена за мене. Јас го послушав и продолжив да работам за Палчо во штабот. Тогаш се собираа декларации за црквата и имаше многу луѓе кои доаѓаа и стари и млади.
