Бебињата родени во есен имаат поголеми шанси да доживеат длабока старост отколку оние што се родени напролет, покажуваат резултатите од повеќе научни истражувања.
Според студија на Универзитетот во Чикаго, луѓето родени во месец октомври имаат најголеми изгледи да доживеат 100 години. Исто така, поволни показатели за долговечност имаат и лицата родени во септември и ноември. Од друга страна, оние родени во март, мај и јули се застапени со дури 40 отсто помал број стогодишници, споредбено со останатите месеци.
Дополнителни податоци од истражување спроведено на северната хемисфера покажуваат дека есенските бебиња во просек живеат подолго од пролетните.
Зошто токму октомвриските бебиња живеат најдолго?
Постојат неколку теории за оваа појава. Една од нив, како што објаснува доктор Несочи Океке-Игбокве, е дека есенските новороденчиња биле помалку изложени на сезонски болести и екстремни температури во текот на првите месеци од животот – што може да влијае на нивната долгорочна здравствена состојба.
„Можно е октомвриското раѓање да создава некаков заштитен ефект од сезонски инфекции што потенцијално можат да влијаат на долговечноста,“ вели д-р Океке-Игбокве.
Иако причинско-последичната врска сè уште не е целосно разјаснета, научниците утврдиле дека луѓето родени во октомври во просек живеат 160 дена подолго од оние родени напролет. Една од можните причини е оптималната изложеност на сончева светлина во текот на бременоста и раниот детски развој.
Што сè влијае врз долговечноста?
Секако, месецот на раѓање не е единствениот фактор. Начинот на исхрана, физичката активност, квалитетот на животната средина и избегнувањето на ризични навики – како пушењето – играат голема улога.
„Во суштина, долговечноста зависи од повеќе меѓусебно поврзани фактори. Но, постојат и мали, понекогаш неочекувани разлики, кои можат да придонесат некој да го доживее стотниот роденден,“ заклучува доктор Океке-Игбокве.
