Францускиот претседател Емануел Макрон денеска изјави дека царините што синоќа ги објави американскиот претседател Доналд Трамп се „брутални и неосновани“ и претставуваат шок за меѓународната трговија.
Макрон рече дека Европа мора да одговори на овие мерки поединечно во секој индустриски сектор, пренесуваат британските медиуми.
Говорејќи за време на состанокот со претставниците на француската индустрија, Макрон додаде дека одговорот на реципрочните царини ќе биде „помасовен“ од одмаздничките мерки против американските царини за челик и алуминиум.
Емануел Макрон денеска ги повика француските компании кои работат во САД да ги прекинат сите инвестициски проекти во таа земја додека не се разјасни најавата на Доналд Трамп за масовно зголемување на царините на увозот од Европската унија.
-Тоа што е важно е дека идните или најавените инвестициски проекти во последните неколку недели се привремено суспендирани додека не ги разјасниме работите со САД, рече францускиот претседател за време на средбата со претставниците на француските индустриски сектори кои се најпогодени од најавените американски царини, пренесува БФМ ТВ.
Макрон се запраша каква ќе порака ќе се испрати доколку главните европски бизнис играчи почнат да инвестираат милијарди евра во американската економија во време кога француската економија е нападната.
