Зухра Груби, мајката на поранешниот прв вицепремиер Артан Груби, кој со месеци е во бегство и се наоѓа на меѓународна потерница, денес се огласи на неговиот роденден со јавно обраќање на Фејсбук. Таа сподели емотивна честитка, полна со гордост и поддршка за својот син, наведувајќи дека неговото отсуство денес е „позабележително од присуството на сите други заедно“.
„Се зборува за твоите дела затоа што ги прават сите горди и ги потсетуваат на годините кога Албанците се чувствуваа претставени и господари во својата земја“, напиша таа, притоа упатувајќи критика кон, како што вели, оние што не успеале да направат што и тој и сега се обидуваат да го уништат неговото наследство.
Зухра Груби го нарече неговото гонење „политичка одмазда и прогон, како во времето на комунизмот“ и изрази надеж дека „вистината ќе победи по Божја волја“.
Артан Груби се наоѓа во бегство од декември 2024 година, кога, според официјалните информации, ја напуштил земјата под изговор на „приватна посета“. Подоцна, по отворањето истрага за малверзации поврзани со работењето на АД Државна лотарија, Министерството за внатрешни работи распиша меѓународна потерница. Иако Обвинителството сè уште официјално не соопштило каде се наоѓа Груби, неофицијално се верува дека тој се крие во Албанија, под заштита на бизнисмен близок до политички кругови.
Ова е првпат Артан Груби или некој од неговото потесно семејство да се огласи јавно по неговото исчезнување.
