Ден за високи гости беше реализиран денеска на армискиот полигон Криволак, во рамките на меѓународната воена вежба „Брз одговор 2025“. Учествуваат припадници од армиите на Република Северна Македонија, САД, Република Албанија, Грција, Италија, Црна Гора, ОК, Австрија и Косово. Меѓународната вежба е дел од најголемата НАТО – вежба оваа година на тлото на Европа, „Defender 25“.
Во вежбовната активност на армискиот полигон „Криволак“ учествуваат над 2.200 армиски припадници од земјите – учеснички. Во текот на денешниот ден, пред многубројни гости меѓу кои и претседателот на Владата Христијан Мицкоски, заменици претседатели на Влада, министри и други, пратеници, генерали од земји учеснички, амбасадори и воени аташеа, градоначалници и претставници на Министерството за одбрана и Генералштабот, беше изведена теренска тактичка вежба.
Претседателката на Република Северна Македонија и врховен командант на вооружените сили, Гордана Сиљановска Давкова рече дека мирот нема алтернатива, тој е избор на храбрите, завет на посветените и обврска на секој што ја носи униформата со чест.
– Денеска, овде, на полигонот „Криволак“, не испишуваме само уште една успешна страница во историјата на нашата армија, туку ја потврдуваме определбата да бидеме дел од оние што го штитат мирот како врвен цивилизациски истакна таа.
Притоа додаде дека оваа вежба не е само демонстрација на воена моќ, туку манифест на солидарност, симбол на единство, потсетник дека само заедно можеме да им се спротивставиме на заканите коишто ги загрозуваат мирот и стабилноста.
– Во време на глобални безбедносни закани, кога светот е растргнат меѓу војните и надежта, нашата армија демонстрира интероперабилност, професионалност и подготвеност да дејствува рамо до рамо со сојузниците, во одбрана на слободата, достоинството и човековите права.
Нашето членство во НАТО не е само политичка формалност, туку стратегиска определба, израз на нашата волја и решеност да бидеме дел од колективниот одговор на современите предизвици и дилеми, нагласи таа.
Безбедноста на народот е врховен закон, за нас, подвлече претседателката.
Таа рече дека оваа вежба е порака дека армиите не се само чувари на границите, туку бранители на клучните вредности. Таа е сведоштво дека македонската држава и покрај сите предизвици, стои цврсто на страната на мирот, безбедноста и заедништвото.
– Особено значајно е што оваа вежба се совпаѓа со 32-годишнината од партнерството меѓу Националната гарда на Вермонт и македонската држава – симбол на нашето длабоко, цврсто и долгорочно пријателство со Соединетите Американски Држави, како столб на трансатлантската безбедност, рече Сиљановска Давкова.
Притоа изрази благодарност на храбрите војници за пожртвуваноста, трудот и посветеноста и на сојузниците за поддршката, за помошта, за споделеното знаење и за заедничката визија за безбедна иднина.
– Овој ден нека биде потсетник дека слободата не е случајна, туку плод на идејна определба и постојана борба за неа. Нека биде инспирација за секој млад човек којшто ја гледа Армијата како место каде што чесно и одговорно се служи, но и се учи како да се сака и брани татковината. Денеска, уште еднаш, ја потврдивме нашата определба да бидеме на страната на мирот, но и да сме подготвени, ако и кога е потребно, да го браниме со сите сили.Тоа е наше право. Тоа е наша должност.
Тоа е наша одговорност. Да продолжиме да градиме силна и кредибилна армија, почитувана во Алијансата и подготвена да ги брани интересите на државата и на народот, но и заедничките интереси, подвлече таа.
Министерот за одбрана, Владо Мисајловски рече дека вежбата претставува јасна демонстрација на посветеноста на македонската Армија кон националната и регионалната безбедност, како и стабилноста на Алијансата.
– Преку планирање, организација и реализација на ваков тип на вежби заедно со американската Армија, Командата на Копнените сили на САД за Европа и Африка, ја зајакнуваме подготвеноста на НАТО и интероперативноста меѓу нашите сојузници и нашите партнери. На овој начин ги унапредуваме способностите за одвраќање и одбрана и ги зацврстуваме националните безбедносни и одбранбени планови и одбранбените планови на Алијансата, додаде тој.
Притоа рече дека денешниот успех е резултат на посветеноста и работата на секој еден припадник во Армијата.
– Дополнително, вежбата преставува и силна потврда за подготвеноста на припадниците на декларираната Лесна пешадиска баталјонска група во пресрет на претстојното оценување во 2026 година. Како земја домаќин на вежбата сакам да ја потенцирам важноста и стратешката позиција на нашиот полигон за обука „Криволак“ кој е уникатен капацитет за извежбување со можност за реализација на вежби од големи размери, истакна Мисајловски.
Началникот на Генералштабот на Армијата на Република Северна Македонија, генерал мајор Сашко Лефчиски изрази задоволство од настанот и рече дека во услови на сложена геополитичка реалност, оваа вежба има за цел да демонстрира динамичко распоредување на сили во Европа, потребни за одвраќање и зголемена одбрана. Во тој контекст, додаде тој, потребата од заедничко дејствување е поголема од било кога. Притоа подвлече дека станува збор за вежба, што ќе прати силна порака.
– Дека заедно сме посилни и поспособни, да ги заштитиме демократските вредности, мирот и слободата, истакна Лефчиски.
Тој се заблагодари на дадената доверба да бидеме домаќини, на оваа, како што нагласи, исклучително важна вежба. Се заблагодари исто така на професионалноста на сите учесници во вежбата.
Задоволство од професионалноста на учесниците во вежбовните активности изрази и заменик командантот на националната гарда на САД, генерал мајор Левон Камптон. Тој ги пофали посветеноста и подготвеноста.
– Сакам да ја изразам нашата исклучителна благодарност на Северна Македонија за нејзината импресивна и непоколеблива посветеност на регионалните мир и безбедност. Северна Македонија не е едноставно и само сојузник на НАТО, вие сте вреден безбедносен партнер и регионално и во глобални рамки. Вашата посветеност на колективната безбедност е навистина за пофалба, подвлече тој.
Како што беше истакнато, цел на вежбата е подобрување на сојузничките воени способности, интероперабилноста на сојузниците и партнерите и преку демонстрација на висока подготвеност да се влијае на одвраќање на кој било вид на малициозни активности од потенцијалните противници.
Притоа, подвлечено беше дека настанот претставува пример за успешна меѓународна соработка, што ги надминува класичните воени параметри и преминува во доменот на долгорочен регионален просперитет и стабилност.
Инаку, во Кавадарци вчера беа организирани Отворен ден на Армијата на Република Северна Македонија и презентација на воената вежба „Брз одговор 2025“.
На градскиот плоштад беа изложени оклопни возила, борбени возила, вооружување и заштитна опрема. Населението имаше можност да ги види оклопните возила, вооружувањето и заштитната опрема.
