Комисијата за заштита на конкуренцијата (КЗК) откри дека четири ланци маркети картелски се здружиле за да влијаат на цените во продавниците, пренесува Само прашај. Од порталот пишуваат дека се работи за два заклучоци од кои во едниот со датум од 20.02.2025 се однесува против Сојузот на стопански комори (ССК), ВЕРО, Тинекс, КАМ и Рептил и нивните застапници, додека вториот Заклучок од 21.02.2025 година е само против Сојузот на стопански комори.
„Во првиот Заклучок, за четирите маркети и ССК има сомнежи дека „на 05.02.2025 година во Сојуз на стопански комори на Македонија одржале состанок на кој склучиле договор и/или усогласено се однесувале, со што ја замениле состојбата на непречена конкуренција на пазарот со состојба на практична соработка помеѓу претпријатијата, чија цел е нарушување на конкуренцијата преку утврдување на заедничко однесување кон добавувачите што претставува постоење на евентуален прекршок од член 59 став (1) точка 1), а во врска со член 7 став (1) точка 1) од Законот за заштита на конкуренцијата“, се вели во напишаното на Само прашај.
Од таму пресметале дека ако бидат казнети според член 59 од Законот за заштита на конкуренцијата или со 10% од вредноста на вкупниот годишен приход остварен во последната деловна година таквата казна би се пресметувала во милиони евра, или тоа во бројки би било дека ВЕРО би требало да плати казна од 10,26 милиони евра, КАМ 26,88 милиони евра и Тинекс со 9,83 милиони евра.
Она што ги издало маркетите било соопштението до јавноста каде се вели дека: Сојузот на стопански комори на Македонија направил ананлиза на пазарот на супермаркети наспроти добавувачи, која што ги детектира точките каде растат цените и каде треба да се интервенира… На состанокот, исто така, беше договорено меѓу сите малопродажни ланци и локални клучни партнери да не се примаат нови ценовници, минимум до крајот на првиот квартал оваа година“.
Ова, според КЗК е склучување на забранет договор и/или усогласено однесување помеѓу конкуренти. Од Комисијата за заштита на конкуренцијата го теретат и ССК како учесник поради тоа ССК влијаел да се стекне перцепција кај сите други претпријатија дека ваквиот договор е постигнат помеѓу сите учесници.
Вториот Заклучок, пак, е само против Сојузот на стопански комори застапувана од Трајан Ангелоски, и тоа поради доставувањето на неточни, нецелосни или податоци кои можат Комисијата за одлучување по прекршок да ја доведат во заблуда, што претставува прекршок согласно член 61 став (1) точка 1) и точка 2) од Законот за заштита на конкуренцијата.
Во пари, овој полесен прекршок би бил до 1% од вредноста на вкупниот годишен приход остварен во последната деловна година, изразена во апсолутен и номинален износ за која претпријатието или здружението на претпријатија има составена годишна сметка.
Инаку, прекршокот на ССК, според Комисијата за заштита на конкуренцијата е бидејќи двајца нејзини членови и тоа извршната директорка Сузана Јаневска и претседателот на Трговската комора при ССК Сашо Дуковски не ја кажувале вистината за состанокот на 05.02.2025 година кога четирите ланци на маркети и членови на Комората се договарале за картелско здружување и влијание врз цени во маркетите.
