Тројцата педијатри кои по налог на заменик Министерот за здравство Јовица Андовски, утврдуваа дали има лекарска негрижа во случајот со тригодишното дете од Кавадарци кое почина на пат до Скопје, не увиделе грешка, потврдуваат за Канал 5 од Министерството за здравство. Оттаму кусо и без детали за случувањата, одговорија дека по направениот стручен надзор комисијата констатирала дека сите постапки биле навремено и уредно извршени.
Во меѓувреме, реагираат родителите на детето кое пред две недели ѝ починало на раце на мајката во приватно возило, бидејќи, како што тврдат, докторката ниту наложила хоспитализација во Кавадарци, ниту им овозможила возило на Итна помош.
Срамота и греота е да се тврди дека нема лекарска грешка, бидејќи ако детето ни било добро како што ни гарантираше докторката што не му даде ни инфузија, тогаш зошто моето синче почина, вели Тони Стојанов, татко на тригодишниот Блажо.
-Докторката е виновна, нашето дете е задушено по пат, кога е тргнато во 6 ипол часот пред наплатната рампа, детето ја испуштила душичката. Голема срамота и брука е, затоа ги замолувам јавните обвинители и судии добро да размислат. Нема да седам мирен, јас правдата ако треба ќе барам и настрана од државата. Виновникот сакам да биде казнет, со одземање на лиценцата и казна затвор за неа. Ова е убиство. Кај нас важи секогаш правилото, тој што е починат да е виновен, живиот никогаш не е виновен. Чиста лага е. Ни кажа дека на детето не му е ништо, ни го даде упатот само и ни кажа нема што вие да барате во Скопје кога детето ви е добро. Ако детето ни беше добро, зошто сега е починато? –Тони Стојанов родител.
Во меѓувреме, обдукцијата наложена од јавен обвинител, и по повеќе од две недели не е завршена. Од Судска медицина за Канал 5 потврдија дека сè уште работат на анализите кои вклучуваат и токсиколошки иследувања.
Извор: Канал 5
