Има физибилити студија за брзата пруга од Коридорот 10 и таа е испратена до финансиските институции, изјави вечерва вицепремиерот и министер за транспорт Александар Николоски.
Николоски е уверен дека државава ќе го има најдобрите услови за финансирање за брзата пруга. Очекува финансирањето да биде прецизирано до средината на јули по што ќе се влезе во селекција и уверува дека ќе биде избрана најдобрата понуда. Притоа, како што посочува, ќе се бара да биде заедничко проектирањето и изведбата и да има фиксен рок за изградба, односно пет години.
Во интервју за Канал 5 телевизија Николоски оцени дека ова е голема шанса и предизвик за домашните градежни комапнии кои доколку се подготвени можат 100 проценти да го завршат градежните активности. За скоро време најавува формални средби со стопанските комори на кои ќе се разговара на оваа тема.
Во однос на трасата, вели дека нема никаква опасност за објектите од А категорија како што се браните и хидроцентралите.
– Кога се проектира мора да бидат одбегнати објектите од А категорија, а браните се секогаш од А категорија што значи дека нема да бидат загрозени овие објекти, рече Николоски.
Смета дека изградбата на брзата пруга е еден од приоритетите затоа што сега на стопанствениците им се потребни понекогаш и денови за да ја превезат стоката.
– Заради состојбата на пругата, на голем дел од неа се вози со 20 до 30 километри на час и просекот на поминување е 12 часа. Кога тоа ќе го помножите со фреквенцијата односно ако има две композиции, тогаш третата ќе мора да чека, посочи Николоски кој прецизно објасни дека според сите пресметки, дури и транспортот се наплатува по половина цена од таа која важи во ЕУ (ние да наплаќаме по едно евро од км, наместо по две евра колку што се наплатува во ЕУ), ќе се заработуваат 120 милиони евра годишно.
Вели дека има јасна заложба и од грчка и од српска страна за изградба на оваа пруга од Коридорот 10 на нивна територија.
Во однос на договорот потпишан со Велика Британија, Николоски повтори дека се работи за многу важен договор со голема веле сила од кој бенефитот не се само инфраструктурните проекти, туку и обуките за нашата администрација, споделувањето на практики во делот на науката…
Покрај договорот за инфраструктурни проекти што беше потпишан во Лондон, во текот на октомври се очекува премиерите на Македонија и на Велика Британија во Лондон да го потшишат и договорот за стратешко партнерство.
