Претседателот на Соединетите Американски Држави, Доналд Трамп, е „целосно способен“ да ги извршува должностите на претседателот, се вели во меморандумот што Белата куќа го објави денеска, по редовниот годишен лекарски преглед на Трамп.
Во белешката се наведени резултатите од лабораториските тестови, физичките прегледи и когнитивниот тест и се заклучува дека Трамп се уште е во „одлично здравје“.
Трамп постигна 30 од 30 на Montreal Cognitive Assessment тестот, се вели во белешката. Ова е тест попознат како MoCA тест и се користи за рано откривање на деменција и благо когнитивно оштетување.
Станува збор за брз и едноставен тест кој трае околу 10 минути, а е дизајниран во 1996 година во Канада.
Тестот проценува функции како што се краткорочна меморија, внимание, говор, пресметка, апстрактно расудување и ориентација во времето и просторот. Максималниот резултат е 30 поени, а сè под 26 поени укажува на можно когнитивно оштетување.
Тестот го спроведува здравствен работник со соодветна обука, а за време на тестот, меѓу другото, потребно е цртање часовник, меморирање зборови, повторување реченици и едноставни задачи за одземање.
Пример од тестот
Поврзете ги точките, нацртајте коцка и часовник
Во првата задача треба да поврзете броеви и букви, од 1 до E. Потоа треба да ја копирате нацртаната коцка и да нацртате часовник што покажува 11:10.
Идентификувајте ги животните
Во задачата за именување, треба да ги препознаете нацртаните животни.
Повторете низа зборови
Во задачата што ја тестира меморијата, испитаникот треба да повтори список со зборови. Во овој пример, тие се лице, кадифе, црква, маргаритка, црвено. Тој има право на два обиди.
Повторете ја низата од броеви
Потоа треба да се повтори серијата броеви што ги чита лекарот (2, 1, 8, 5, 4). После тоа, треба да се повтори серија од три броја, од последниот до првиот (7, 4, 2).
Препознајте го А
Во продолжение докторот чита низа букви, а субјектот мора да дава знак со рака секогаш кога ќе ја слушне буквата А. Во примерот е дадена серијата: F B A C M N A A J K L B A F A K D E A A A J A M O F A A B.
100-7
На последното прашање што го тестира вниманието, испитаникот треба да го одземе бројот седум од бројот 100 и да продолжи додека не го достигне бројот 65.
Повторете реченици
Во следната задача треба да повторите две реченици: „Знам само дека Џон е тој што помага денес“ и „Мачката секогаш се криеше под каучот кога кучињата беа во собата“.
Зборови кои почнуваат со буквата Ф
Во тестот за вербална флуентност, треба да наведете што е можно повеќе зборови кои започнуваат со буквата F во рок од една минута. Доволни се 11 зборови.
Најдете сличности
Во тестот за апстрактно расудување, треба да ги наведете сличностите помеѓу воз и велосипед, и часовник и линијар.
Повторете ја низата
Во претпоследната задача треба да ја повторите низата зборови од претходно (лице, кадифе, црква, маргаритка, црвена).
Датум, локација, ден во неделата
На крајот од тестот испитаникот треба да го наведе точниот датум, ден во неделата, местото и градот во кој се наоѓа.
