Преговорите за зголемување на минималната плата во Србија за следната година ќе почнат кон крајот на август или почетокот на септември, објави денеска српскиот министер за финансии Синиша Мали.
Со тоа зголемување, минималната плата од 1 јануари 2026 година би изнесувала 550 евра, изјави Мали по состанокот на Социјално-економскиот совет, каде што беше одлучено минималната плата од 1 октомври оваа година да биде вонредно зголемена за 9,4 проценти, од 53.592 на 58.630 динари, односно од 450 на 500 евра.
Цената на еден работен час ќе биде зголемена од 308 на 337 динари.
Мали рече дека целта на Владата на Србија е минималната плата од 1 јануари 2028 година да биде 650 евра.
Со вонредното зголемување на минималната плата оваа година и редовното зголемување од 1 јануари следната година, кумулативниот раст ќе биде 20,4 проценти, а неоданочливиот дел од приходите ќе се зголеми за толку, од 28.423 на 34.322 динари, објави тој.
Даночното оптоварување на платите ќе се намали на 59,7 проценти, а минималната плата на 55,6 проценти.
Претседателката на СЕС и министерка за труд, Милица Ѓурѓевиќ, изјави дека одлуката за вонредното зголемување на цената на трудот е резултат на социјалниот дијалог во Србија и дека е донесена едногласно. Таа рече дека околу 90.000 работници во Србија сега примаат минимална плата.
