Поранешниот прв вицепремиер на Владата, Артан Груби, објави дека се повлекува од јавниот живот, соопштувајќи ја својата одлука како личен чекор за зачувување на интегритетот и за доброто на семејството. Ова следува откако тој беше додаден на црната листа на САД поради корупција.
Во своето обраќање до јавноста, Груби изрази гордост на својата досегашна посветеност на унапредувањето на еднаквоста на Албанците во Северна Македонија, регионалниот мир, интеграцијата во НАТО, стратешкото партнерство со САД и процесот за членство во Европската Унија. Тој подвлече дека овие вредности не само што го воделе низ јавниот живот, туку и претставувале обврска што ја чувствувал низ целата своја кариера.
„Фактот што Северна Македонија денес е членка на НАТО и ги започна преговорите за членство во ЕУ е јасен доказ за нашата посветеност и за искрената поддршка од нашите пријатели од САД и ЕУ,“ истакна Груби.
Во својата одлука да се повлече, Груби објаснува дека долгогодишните напади и неправедни толкувања го навеле да размисли за својата улога во овој важен момент за земјата. Нагласувајќи дека останува „чист како солза“ пред Бога, семејството и пријателите, тој истакна дека со ваквата постапка сака да избегне да стане политички товар и да го зачува континуитетот на работата на лидерот на ДУИ, Али Ахмети.
„Ова е тешка, но неопходна одлука,“ додаде Груби, изразувајќи верба во лидерството на Ахмети како „најголема надеж за Албанците и за сите граѓани на Северна Македонија.“
Груби изрази благодарност до сите кои го поддржувале низ годините, ветувајќи дека ќе остане посветен на вредностите за општо добро, но сега како граѓанин и поддржувач.
Во продолжение целосниот статус на ФБ на Груби
Лична одлука во служба на општото добро
Почитувани граѓани,
Целиот мој јавен живот, бескомпромисно сум посветен на еднаквоста на Албанците во Северна Македонија, за регион во мир, за целосна интеграција во НАТО, за стратешко партнерство со Соединетите Американски Држави и за членство во Европската Унија.
Тоа се вредности кои не се само мој двигател, туку и обврска што отсекогаш сум ја чувствувал.
Нашите достигнувања, за кои сите сме сведоци, не се само заслуга на мојата посветеност и на моите колеги, туку и на искрената и континуирана поддршка од нашите пријатели од Соединетите Американски Држави и Европската Унија.
Фактот што денес Северна Македонија е членка на НАТО и ги започна преговорите за членство во Европската Унија е јасен доказ за оваа соработка и заедничка посветеност.
Но, цената на оваа посветеност, цена која отсекогаш била во служба на вредностите и правдата, е тешка за мене и за моето семејство.
Огромните напади низ годините, погрешните толкувања и нефер штрајкови ме натераа да размислувам за мојата улога во овој важен момент за земјата и за нејзината иднина.
Иако одлуката нагласува дека таа не е за осуда, туку за поттикнување на подобрување на однесувањето, јас пред Бога, семејството и пријателите сум чист како солза, но со намера да придонесам за вистината, која многумина од вас гледам дека веќе ја знаете, а за да не бидам ничив политички товар, решив да се повлечам од јавниот живот и за ова го информирав Претседателот Ахмети уште од првиот ден.
Ова е тешка одлука, но неопходна за мир на моето семејство и зачувување на мојот личен и политички интегритет, како и за поддршка на континуитетот на работата и посветеноста на нашиот лидер Али Ахмети.
Верувајте во неговиот правилен пат, пат кој беше и останува најголема надеж за Албанците и за сите граѓани на Северна Македонија.
Секогаш останувам посветен на овие вредности и ќе бидам покрај нив, како граѓанин и како поддржувач на општото добро.
Со почит и огромна благодарност со сето срце за вашата поддршка низ годините,
Артан Груби
