Советодавниот комитет на Советот на Европа во своето најново мислење констатира дека Бугарија не постигнала значителен напредок во осигурувањето на правата на малцинствата.
Во документот, објавен денес, се упатуваат препораки до бугарските власти да ги усогласат своите активности со Рамковната конвенција за заштита на националните малцинства.
Иако Бугарија активно ги поддржува правата на свои малцинства во странство, слични напори не се забележуваат во самата земја. Според Советодавниот комитет, постои значителен недостаток на свест за малцинските права, кои се клучен аспект на човековите права. Не се преземени мерки за имплементација на долгогодишни препораки, особено во однос на слободната самоидентификација и заштитата на малцинските права.
Лицата кои се идентификуваат како Македонци продолжуваат да бараат заштита според Рамковната конвенција, но властите не признаваат постоење на објективни критериуми, што им отежнува остварување на индивидуалните права. Нивните обиди за регистрација на здруженија не успеаја. Исто така, Помаците изразија желба за заштита, но властите не ги признаваат нивните самоидентификациони критериуми“, се наведува во извештајот.
Комитетот истакнува дека правата на малцинствата и нивната ефективна реализација мора да бидат приоритет за властите. Тие нагласуваат дека е важно да се следи практичен пристап кон Македонците и Помаците, со фокус на недискриминација и равноправен пристап до права.
Според пописот од 2021 година, Турците претставуваат најголемо малцинство во Бугарија со 8,4% од населението, следувани од Ромите (4,4%). Само 1.143 лица се идентификуваат како Македонци.
„Лицата кои се идентификуваат како Македонци известиле за обиди од властите да ги обесхрабрат во нивната самоидентификација. Пријавени се и инциденти за време на јавни настани и пречки во организирање протести. Учесниците во истражувањето забележуваат дека свеста за малцинските права во бугарското општество е на ниско ниво“, се вели во извештајот.
Дополнително, Европскиот суд за човекови права утврдил непочитување на правото на слобода на собирање и здружување во 12 случаи против Бугарија, поврзани со невладините организации на Македонците, кои властите постојано одбиваат да ги регистрираат.
Советодавниот комитет повикува властите да го поддржат учењето на малцинските јазици и да обезбедат континуитет на наставата од предучилишно до високо образование, особено во региони каде што живеат значителен број на членови на овие заедници.
