Макало е традиционално македонско јадење базирано на лук. Најосновниот вид макало се подготвува од лук, топло масло или путер, вински оцет, млака вода и сол, кои се додаваат во дрвен сад и добро се мешаат. На ова јадење често му се додаваат сушена црвена пиперка, сечкан магдонос, луто пиперче, ореви, млеко или јогурт.
Постојат различни видови макала кои можат да вклучуваат печени лути пиперки, модри патлиџани, зелени домати, свежи или печени црвени домати или варен компир. Макалото може да се сервира како сос или како предјадење, во зависност од состојките што се користат. Обично се јаде со многу леб и сирење и е одличен додаток на скара.
Според „TasteAtlas“, македонското макало моментално е најдобриот сос во светот. Во продолжение ви нудиме рецепт за ова јадење кое можете да го јадете како намаз на леб, со скара, како сос – како и да посакате.
Состојките можете да ги прилагодите според вашиот вкус бидејќи, како што споменавме погоре, во макалото навистина може да се додаде сè, но за основниот рецепт ќе ви бидат потребни:
- лук
- масло
- оцет
- вода
- печени лути пиперки
- сол
- магдонос
Подготовка
1. Подгответе го лукот
Прво излупете го и измијте го лукот, а потоа ставете го во дрвен сад за пасирање.
Можете да го ставите и во блендер, но сосот ќе има подобар вкус ако го испасирате рачно во дрвен сад.
2. Направете паста
Додајте сол на лукот (количината прилагодете ја според вашиот вкус) и пасирајте го додека не добиете мазна смеса, слична на мајонез.
3. Додајте масло
Додајте масло на лукот и мешајте додека сè не се изедначи.
4. Додајте оцет и вода
Постепено додавајте оцет и промешајте, а потоа додајте и млака вода и повторно добро промешајте.
5. Додајте пиперки
На крај додајте ги лутите пиперки и ситно сечканиот магдонос (по желба), измешајте и сервирајте со леб.
