Двајца мажи имале брутална физичка пресметка во авион на „Рајанер“ на лет од Загреб до Малме, Шведска, потврдија повеќе извори, вклучувајќи го и шведскиот дневен весник „Афтонбладет“, кој објави видео од инцидентот.
На видеото се гледа еден од патниците, облечен во жолта маичка без ракави, како постојано удира друг маж во црна маица, кој се обидува да се заштити со избегнување на ударите. Тепачката се случила во средината на авионот, непосредно пред слетувањето, при што повеќето патници носеле безбедносни појаси. Според сведоците, тепачката избувнала веднаш откако се изгаснале светлата во кабината, што очигледно довело до паника кај патниците. „Имало крв насекаде. Децата плачеле, жените врескале, луѓето трчале кон задниот дел од авионот“, изјавила една патничка за Aftonbladet. Таа исто така рекла дека патничката пред неа била покриена со крв: „Сè уште сум потресена, речиси паднаа врз мене и мајка ми“. Друга патничка ја опишала сцената како „тотален хаос“, со врескање, туркање и други патници кои се обидувале да се оддалечат од двајцата напаѓачи. „Се удирале еден со друг, паѓале врз други луѓе, сите се обидувале да избегаат“, рекла таа.
По слетувањето на аеродромот во Малме, што се случи кратко пред 22:30 часот, безбедносните лица веднаш влегоа во авионот и ја презедоа контролата врз ситуацијата. Патниците беа евакуирани, а терминалот беше под силен полициски надзор. Дејвид Карлсон од компанијата „Сведавија“, која управува со аеродромите во Шведска, потврди дека полицијата интервенирала, но дека инцидентот не влијаел на редовниот тек на сообраќајот. „За дополнителни информации, ве молиме контактирајте ја полицијата“, рече тој кратко. Според информациите објавени од шведскиот весник „Сидсвенскан“, двајцата мажи се државјани на Шведска, а едниот од нив е официјално пријавен за физички напад.
