Во тензична атмосфера и денеска помина седницата на собраниската Комисија за социјална политика, демографија и млади, на чиј дневен ред имаше само една точка – Предлог измените на Законот за пензиското и инвалидското осигурување, по скратена постапка. И денеска пратениците на СДСМ побараа да се дополни дневниот ред со Законот за правата на бранителите, но претседавачот на Комисијата пратеничката Имрлије Салиу-Фетаи нагласи дека таа е назначена да ја води оваа седница на Комисијата само со една точка на дневниот ред. Членовите на Комисијата од Коалицијата „Влен“ истакнаа дека законот за бранителите нема да помине се додека со закон не се реши и статусот на поранешните припадници на ОНА. По ова, пратеничката група на СДСМ на прес-конференција најавија дека ќе поднесат кривична пријава против пратеничката Имрлијe Салиу-Фетаи од „Влен“ за како што кажаа, грубо кршење на Деловникот околку денешното претседавање со собраниската Комисија за социјална политика, млади и демографија.
-Ние најавуваме дека ќе преземеме конкретни правни мерки, односно ќе поднесеме кривична пријва против претседавачот со Комисијата, Имрлије Фетаи-Салиу заради грубо кршење на Деловникот и грубо кршење на правата на пратениците. А, воедно ќе поднесеме и иницијатива до Уставниот суд со којашто ќе бараме да се утврди прекршувањето на правото на пратениците на коишто им беше оневозможено согласно Деловникот да постават и да предложат измена и дополнување на дневниот ред, рече координаторот на пратеничката група на СДСМ, Оливер Спасовски.
Од Коалицијата „Влен“ попладнево реагираа преку писмено соопштение, во кое посочуваат дека тие ја потврдуваат својата, како што велат, непоколеблива позиција додека се дел од владата, законот за бранители нема да помине без вклучување на поранешните припадници на ОНА. Нагласуваат дека секој обид за еднострано донесување на овој закон е неприфатлив и е во спротивност со принципите на правда и еднаквост.
-Во континуираните напори за извртување на фактите и создавање забуна во јавноста, СДСМ продолжува со неоснованите дезинформации. Нема прекршување на Деловникот на Собранието од страна на нашата пратеничка, Имарлие Салиу-Фетаи. Потсетуваме дека Салиу-Фетаи не е претседателка на Комисијата за социјални работи, млади и демографија. Таа едноставно водеше точка од дневниот ред на Комисијата, за што доби овластување од претседателот на Собранието, согласно член 126, став 3 од Деловникот на Собранието. Така, Салиу-Фетаи постапила целосно почитувајќи ги законските процедури и нема основа за тврдењата на СДСМ. Јасно е дека преку овие постапки СДСМ и Оливер Спасовски се обидуваат да го оттргнат вниманието на јавното мислење. Законот кој денеска го изгласа Комисијата се однесува на зголемување на пензиите, директно подобрување на животот на граѓаните. Реакцијата на СДСМ и Спасовски е отворен обид да се блокира ова покачување и да се избегне расправата за конкретни поволности за пензионерите. Коалицијата ВЛЕН нема да дозволи оваа измамничка стратегија да ги прикрие вистинските проблеми со кои се соочува државата и нејзините граѓани, се наведува во соопштението на „Влен“ и посочуваат дека остануваат посветени на транспарентноста, почитувањето на законите и заштитата на интересите на албанските граѓани и на сите граѓани на земјата.
Иако беше тензично на Комисијата за социјална политика, на седница денеска комисискиот филтер го помина Предлог-Законот за пензиско и инвалидско осигурување. За ова попладнево преку писмено соопштение реагираа од ВМРО-ДПМНЕ. Посочуваат дека со денешното делување во Собранието, СДСМ сакала да го спречи покачувањето на пензиите.
-СДС, како и во повеќе наврати до сега, покажа дека е против парите да завршуваат кај граѓаните. Овој пат СДС се стави против една од најважните категории граѓани, пензионерите, кои работниот век го поминаа придонесувајќи за македонското општество. Со денешното делување во Собрание, СДС сакаше да го закочи и спречи покачувањето на пензиите, линеарно за сите пензионери. СДС прави се само да ги блокира процесите, како и да спречи парите да завршуваат граѓаните, а во конкретниот случај од денес, кај пензионерите. Помина времето кога СДС можеше да прави што сака во државата. Во институциите постои ред, поредок и законски процедури кои секој треба да почитува, посочуваат од ВМРО-ДПМНЕ.
