Обвинетиот Елвин Куртовиќ призна вина за убиството на 59 годишниот златар Васил Ефтимов, кое се случи во август минатата година среде бел ден кај фрекфентниот трговски центар Мавровка.
- Воопшто не се чувствувам добро емотивно, но и психички. Многу се каам за кривичното дело. Не сакав да го убијам човекот. Се случи несреќа. Бев под дејство на дроги неколку денови, навистина. Пред тоа лежев за некакви ситни дела во споредба со ова што сега одговарам. Многу ми е жал, тоа е се што имам да кажам. – Елвин Куртовиќ обвинет за убиство на Васил Ефтимов.
Поради веќе постоечкото криминално досие, Куртовиќ се соочува со минимална казна затвор од 10 години и максимална доживотен затвор. Неговата адвокатка побара најблага санкција, бидејќи тој не можел правилно да расудува наоѓајќи се под дејство на дрога, но и поради државата која не успеала да го ресоцијализира во затворот.
- Ја поделувам вината за стореното кривично дело на обвинетиот со државата. Точно тој убил човек. Но, барам еднаш да бидеме одговорни и да им погледнеме на фактите во очи, а тоа е дека во нашата држава многу кривични дела се случуваат затоа што наделжни институции не си ја завршуваат соодветно својата работа. – Софија Лаличиќ адвокатка на обвинетиот.
За убиството на еснафот Васил Ефтимов, кое според Обвинителството се случило од користољубие, се осомничени двајца. Во потрагата беа вклучени специјалните полициски сили, хеликоптер и дронови. Куртовиќ во време на убиството бил затвореник во Идризово пуштен на викенд, кој не се вратил во дадениот рок, што ја вознемири јавноста и покрена дебата дали затворите се „хотел Промаја“ и колку ни се безбедни градовите доколку нема контрола во затворските установи.
