Трајко Славески, како гувернер на Народната банка, нема да биде независен и нема да води вистинска и балансирана монетарна политика.
Ова е оценката на претседателот на СДСМ, Венко Филипче, за одлуката на претседателката на државата, Гордана Сиљановска-Давкова, Славески да го предложи за гувернер.
Со ваквиот предлог, според Филипче, ВМРО-ДПМНЕ докажува дека при одлучувањето и водењето на државата нема интерес да им служи на граѓаните, туку на сопствените теснопартиски интереси.
„Со предлогот Трајко Славески да биде гувернер на Народната банка, и последната институција која ја водеше експерт ќе биде партизирана“, вели Филипче.
Според него, ваквиот избор ќе ја доведе во ризик целата макроекономска политика, бидејќи, како што истакна, Славески нема да води монетарна политика каква што ѝ е потребна на државата, туку ќе ги следи партиските директиви.
Претседателот на СДСМ, Венко Филипче, попладнево е со членовите и граѓаните на Желино, Брвеница и Гостивар.
СДСМ ја покажува својата одговорност и човечка солидарност со предлог Законот за помош на настраданите во Кочани. Како што истакна претседателот на СДСМ, Венко Филипче, законот е директен одговор на реалните потреби на семејствата на настраданите и повредените во трагедијата. Тој денеска повторно го повика ВМРО-ДПМНЕ заедно да го изгласаат законот во Собранието.
„Дадовме предлог Закон за помош на настраданите во Кочани. Тие луѓе имаат вистинска мака. Луѓето што ги сретнавме во Кочани имаат потреби и тоа воопшто не е лесно“, истакна Филипче.
Тој посочи дека трошоците со кои се соочуваат погодените семејства се значителни и вклучуваат медицински третмани, рехабилитација и психолошка поддршка.
„Имаат трошоци за лекување, за рехабилитација, потребна им е психолошка поддршка. И ВМРО-ДПМНЕ не го поддржува законот. Зошто? Затоа што бил противуставен. Подготвени се да измислат секаков изговор и во ваква ситуација“, рече тој.
Филипче потенцира дека во законското решение се опфатени и семејствата погодени од други трагедии, со цел никој да не биде изоставен.
„Во законот ги вклучивме и семејствата од другите трагедии. Да не речат дека бегаме од Тетово, Беса транс, Ласкарци. Но, ВМРО-ДПМНЕ не сака да разговара на ниту една тема – сѐ одбиваат. Повторно го повикувам ВМРО-ДПМНЕ да го донесеме заедно законот за Кочани“, изјави претседателот на СДСМ.
