Претседателот на СДСМ Венко Филипче го оцени состанокот со премиерот и лидер на ВМРО-ДПМНЕ Христијан Мицкоски, како добар и конструктивен, потенцирајќи дека ова е позитивен сигнал дека тие ги слушаат барањата на граѓаните. Мицкоски и Филипче се договориле да бидат формирани работни групи за реформската агенда во делот на правосудството, енергетиката и здравството.
Имавме добар и навистина конструктивен состанок со премиерот. Сметам дека и до него јасно е стигната пораката и барањето на граѓаните за некаква форма на заедничка работа во сфери кои што се битни да го подобрат квалитетот на живеење. Начелно договоривме дека ќе работиме на начинот да формираме заеднички тела или работни групи во делот, пред се, на спроведување на реформската агенда, рече Филипче.
Според него, првичните закони кои треба да стигнат во Собранието се од правосудството, нешто што ги тангира сите граѓани, од областа на енергетиката и од здравството.
Претседателот на СДСМ рече дека има воља од двете страни, дека допрва треба да се разработи методологија за работа на заедничките групи, како и дека ова е првичен состанок. Следна средба засега не е договорена, но ќе треба да бидат номинирани експерти кои ќе бидат дел од работните групи.
Сега ќе номинирам неколку експерти од областа на правосудството и енергетиката кои ќе се вклучат во изработката на законите коишто се дел од реформската агенда а треба да стигнат. Ова е меѓупартиска средба, но секако дека ќе бидат поканети и сите партии да се вклучат, рече Филипче.
Тој очекува дека по ова сите политички партии ќе седнат на масата.
Ова е за доброто на државата. Немаме доволно човечки капацитет, а младите се повеќе заминуваат од земјата. Затоа, мора да се пушти порака за обединување за доброто на државата, вели Филипче.
На средбата се зборувало и за евроинтеграциите и уставните измени, но, како што изјави Филипче, за жал, тука тие имаат различни позиции.
Ги разбирам позициите на премиерот. Останува за ова да разговараме дополнително, рече претседателот на СДСМ.
Филипче уште еднаш нагласи дека не станува збор за етнички состанок.
Смета дека средба со другите лидери треба да биде следно што треба да се случи по оваа средба.
Граѓаните со ова треба да бидат свесни дека некој ги слуша нивните барања, рече Филипче оценувајќи ја оваа средба како позитивен сигнал наведувајќи дека за првпат се случува вакво нешто во земјата.
Одговарајќи на новинарско прашање во врска со случајот со Модуларната болница, рече дека не чуствува одговорност и дека нема проблем случајот да биде повторно отворен.
