Во текот на ноќта, на кружниот тек кај хотелот „Континентал“ во Скопје беше повторно поставен споменикот на Андон Лазов Ќосето, кој пред шест години беше отстранет од пред зградата на Врховниот суд од страна на тогашната градска власт, предводена од поранешниот градоначалник Петре Шилегов.
На локацијата е изграден нов бетонски постамент, на кој повторно е поставена скулптурата на Ќосето, прикажан со кама во рака. Одлуката за враќање на споменикот беше донесена од Советот на Град Скопје во декември 2023 година. Актуелната градоначалничка Данела Арсовска уште во првите месеци од мандатот најави дека ќе го врати споменикот на Ќосето.
Во врска со поставувањето на спомен-обележјето, Град Скопје преку соопштение информира:
„Со поставувањето на спомен обележјето во чест на македонскиот револуционер Андон Лазов Јанев – Ќосето, оддаваме признание за неговиот неуморен дух и саможртва во борбата за слободна и независна Македонија. Андон Лазов Ќосето, познат по својата борбеност и непокор, е симбол на македонската историја и еден од истакнатите учесници во Илинденското востание. Неговата улога во револуционерното движење е од непроценливо значење за денешната слобода и независност на нашата држава.“
Споменикот на Ќосето беше првиот што беше отстранет од проектот „Скопје 2014“ во 2018 година, исто така во доцните ноќни часови, како што беше и првично поставен. Историчарите имаат поделени мислења за Ќосето – за едни тој е патриот и борец против непријателите на ВМРО, додека за други е контроверзен лик со темна улога, вклучително и наводна ликвидација на сопствениот брат.
Поставувањето на споменикот повторно ја отвори јавната дебата околу симболите и толкувањата на македонската револуционерна историја.
