Словенечкиот суд во петокот донесе првостепена пресуда со која го ослободи Јанез Јанша, премиер во три мандата и клучен опозиционер во земјата и двајца наводни негови помагачи од обвиненијата за наводна злоупотреба на положбата и овластувањата и за корупција.
Јанша, претседател на главната опозициска Словенечка демократска партија (SDS), го отфрли обвинението како обид тој да биде отстранет од политиката пред општите избори во 2026 година.
„И покрај тоа што ова беше јасна и видлива фарса од самиот почеток, обвинителот побара две години затвор. Оваа победа денеска е во наводници, нашата борба овде не е завршена“, им рече Јанша на своите расположени поддржувачи по излегувањето од судот.
Стотици негови приврзаници се собраа пред судската зграда во Целје на истокот на земјата, веејќи словенечки знамиња и носејќи транспаренти, обвинувајќи го судството дека е корумпирано и пристрасно.
Јанша, 66-годишен десничарски политичар, беше обвинет за злоупотреба на моќта при продажба на имот во 2005 година, кога го служеше својот прв мандат како премиер. Во случајот се опфатени и директорите на две компании кои учествувале во серија трансакции со продажба на парцела во сопственост на Јанша во наводна размена за купување стан за него во главниот град Љубљана.
Јанша, кој се залагаше за независност на Словенија од тогашна Југославија во 1991 година и трипати беше словенечки премиер, во 2013 година беше осуден на две години затвор за поткуп во договор со финската групација од наменската воена индустрија „Patria“ во 2006 година додека го служеше вториот премиерски мандат. Тој ги отфрли сите обвиненија.
