Јавното препријатие за државни патишта (ЈПДП) информира дека е завршена претквалификациската фаза на тендерот за изградба на автопатот Букојчани-Кичево кој е дел од Коридорот 8.
Се додава дека девет фирми, кои ја поминале оваа фаза, влегуваат во процесот за избор на изведувач за изградба на автопатот и дека денеска добиле покана да ги достават своите финансиски понуди до 30 септември. По овој рок, како што додаваат од ЈПДП, ќе следува фаза на евалуација на понудите и избор на најподобен изведувач.
Според претходните најави, вкупните проектирани трошоци за изградба на делницата од Букојчани до Кичево со должина од 10,2 километри изнесуваат 132,7 милиони евра, од кои 110 милиони евра се заем од Европската банка за обнова и развој (ЕБОР), а 19,8 милиони евра инвестициски грант од Инвестициската рамка за Западен Балкан.
Согласно повикот за претквалификација објавен на 4 февруари годинава, новата автопатската делница ќе има двоен коловоз со по две сообраќајни ленти од 3,5 метри со брзина на движење од 100 километри на час. Делницата е надоврзување на трасата Гостивар-Букојчани, во должина од 30,1 километар.
