Франческо Ачерби стана херој на Интер во историската вечер на Сан Сиро кога постигна гол во 93-тата минута од судиското продолжение против Барселона и ги испрати црно-сините во финалето на Лигата на шампионите.
Италијанскиот стопер израмни на 3:3 кога сите помислија дека натпреварот е завршен, а Интер беше на колена.
Ачерби, роден пред 37 години во градот Виколо Предабиси во предградието на Милано, имаше тешка кариера – од клубовите од пониските нивоа како Павија, Рената, Специја и Реџино, преку Серија А со Киево и Милан, до врвот со Интер.
Неговиот живот беше обележан со борба со алкохолизмот, па дури и со две победи над ракот на тестисите.
– Кога почина татко ми додека играв за Милан, паднав на дното и како да заборавив да играм фудбал. Почнав да пијам и пиев сè во таа состојба – рече Ачерби.
Ачерби не се откажа
– Можеби изгледа како ужасен парадокс, но ракот ме спаси. Беше како да морав да започнам нов живот и да го видам светот на начин што целосно го заборавив.
Тој беше лекуван со хемотерапија, ја победи болеста и стана еден од најдобрите стопери во Италија, со статус на репрезентативец. Со Италија го освои Европското првенство во 2021 година.
– Стравот исчезна. Си помислив што ќе правам ако ракот се врати и реков дека повторно ќе се соочам со него. Примав хемотерапија, беше како да влегувам во паралелен свет. Тоа е свет на болка и храброст.
