Италијанската модна куќа Прада ја разгледува можноста да го купи познатиот бренд Версаче, кој нејзиниот сопственик Капри Холдингс го стави на продажба. Како што објави Ројтерс, Прада ја ангажирала инвестициската банка Citi за да ја процени потенцијалната понуда за преземање на еден од најпрепознатливите луксузни брендови во светот.
Одлуката доаѓа во време кога Капри Холдингс, американскиот сопственик на Версаче, забележува пад на продажбата на глобалниот пазар на луксуз од 400 милијарди долари. Главната причина за овој пад е намаленото трошење на богатите кинески купувачи, што ја разниша довербата во индустријата и го означи крајот на нејзиниот период на бум.
На почетокот на оваа година, Капри веќе се обиде да се продаде – Тапестри, сопственик на брендот Коуч, се повлече од аквизицијата од 8,5 милијарди долари. По неуспехот на овој договор, Капри Холдингс одлучи да размисли за продажба на своите клучни брендови, вклучувајќи ги Версаче и Џими Чу.
Версаче, симболот на италијанскиот луксуз, во моментов сочинува една петтина од приходите на Капри Холдингс. Сепак, брендот се соочува со пад – приходите во последната фискална година паднаа на 1,03 милијарди долари, додека претходната година тие изнесуваа 1,1 милијарди долари. Оперативната маржа забележа уште подраматичен пад, од 13,7 на само 2,4 отсто.
Модната куќа Версаче е основана во 1978 година во Милано од дизајнерот Џани Версаче, чии смели дизајни и луксузен стил брзо станаа синоним за италијанската мода. По неговата трагична смрт во 1997 година, семејството продолжи да ја води компанијата до 2018 година, кога брендот беше продаден на Капри Холдингс.
Од друга страна, Прада расте и покрај падот на луксузната индустрија. Во третиот квартал од 2024 година, оваа италијанска модна куќа оствари раст на продажбата од 18 отсто, што аналитичарите го гледаат како резултат на успешна стратегија. Сепак, тие се скептични за можното купување на Версаче, потсетувајќи на неуспешните обиди на Прада да ги преземе брендовите Џил Сандер и Хелмут Ланг кон крајот на 1990-тите.
Главниот извршен директор на Прада, Андреа Гуера, на почетокот на оваа година изјави дека компанијата не планира никакви големи аквизиции и дека е фокусирана на развој на постоечки брендови.
Веста за можната продажба веќе влијае на пазарот – акциите на Капри Холдингс поскапеа за 5 отсто во претпазарното тргување, додека акциите на Прада на берзата во Хонг Конг забележаа благ пад од 0,4 отсто.
Дали Прада ќе одлучи да го прошири своето портфолио со купување на Версаче или ќе се повлече од трката, останува да видиме. Едно е сигурно – судбината на еден од најпознатите луксузни брендови во светот виси на конец.
