Со прикажување уплатница од една банка во Скопје, адвокатите на првообвинетиот Љупчо Палевски, на денешното рочиште за убиствата на Вања Ѓорчевска и Панче Жежовски, се обидоа да му прикажат алиби на својот клиент за времето на убиството на Вања.
Адвокатот на Љупчо Палевски покажа уплатница од Халк банка од 27.11.2023, две фотографии, скриншот од Фејсбук, скриншот од Телеграм, отпусно писмо од „Аџибадем Систина“ од 16.07.2020, ургенција до Телеком од 16.09.2024 година. Тој го повлече барањето до Улици и патишта од 20.08.2024 за движењето на возило „фиат добло“, бидејќи добиле одговор од јавното претпријатие дека не чуваат записи повеќе од 30 дена. Со ова адвокатите на првообвинетиот Љупчо Палевски, на денешното рочиште за убиствата на Вања Ѓорчевска и Панче Жежовски, се обидоа да му прикажат алиби на својот клиент за времето на убиството на Вања.
– Баравме запис од надзорните камери на Халк Банка од 27.11.2023 за периодот од 10 до 12 часот за да утврдиме кога Палевски влегол во Банката. Доставуваме уплатница за извршена уплата од Палевски во 11.40 часот. Палевски два пати се враќал во Банката, во експозитура Буњаковец, на Партизански одреди, поради уплатницата – рече адвокатот на Палевски.
Обвинителката даде приговор велејќи дека критичното време на кое се однесува уплатницата воопшто не е од интерес на оваа постапка бидејќи од презентираните видео записи за 27.11.2023 година од Сејф сити, е произлезено дека возилото „рено кангу“ управувано од Палевски на 27.11 во 10 часот веќе се враќа во седиштето на партијата Десна, а уплатницата е од 11.44 часот.
– За нас овој доказ е битен, бидејќи со тоа го докажуваме спротивното од она што го вели јавниот обвинител. Нивниот доказ како возилото се шета по Скопје, без утврдени ликови, не може да биде посилен доказ од тоа дека Палевски во истиот временски период бил во Халк банка. Оттука е невозможно да биде во исто време на две локации. Овој доказ треба да ни биде дозволен, бидејќи е битен за одбраната – рече адвокатот на Палевски, Јовица Страшевски.
На тоа Палевски додаде дека за да стасал од седиштето на партијата до банката му требало половина час.
– Бараме да се обезбедат и снимки од експозитурата на таа банка. Со сведокот Мартин Панчевски, професор во пензија, колку време сме разговарале и сме чекале ред. На таа околност се однесува овој доказ – рече Палевски.
Неговиот адвокат побара судот да се обрати до СВР Велес за тоа дали Боре Видевски поседува дозволи за оружје со тип на оружје, калибар и фабрички број.
– Судот да се обрати до Телеком, да побара податоци за телефонскиот број 071/491-130 со листа на појдовни и дојдовни повици на претплатникот Весна Палевска, сопруга на обвинетиот. Барањето се однесува за базни станици за периодот 21 до 29.11.2023 година. Базните станици се важни за утврдување на околноста време на сторување на кривичните дела. Според базните станици точно ќе утврдиме каде бил Палевски – рече адвокатот Страшевски.
Обвинителката реагираше дека во досегашниот тек на постапката, од Обвинителството биле изведени докази кои се однесуваат на севкупната телефонска анализа и на телефонскиот број користен од обвинетиот Палевски, а на кој претплатник била Весна Палевска.
– Не е точно дека ги имаме сите цедеа за телефонските разговори. Тие се манипулирани и фалсификувани. Пред мене е доказ, кој ќе го цитирам, за фалсификатот на тоа цеде. Тоа е извештај од Телеком до ОЈО, табела во која се содржани повици и базни станици. Доказот е на страна 36 од 120 страни, за ден 22.11.2023 година, каде од 13 часот до 21.18 часот се избришани сите полиња за податоци за базни станици. Еве ги пред мене, се гледаат празни, господин судија. Од телефонската анализа, на која се повикува ЈО постои извештај во форма на прилог-табела за базни станици, изготвена од МВР, одделение за криминалистичко разузнавање и анализа, кое го обработило огромниот број податоци од Телеком и подготвило прилози за сите 12 телефонски броеви кои се дел од истрагата во судскиот процес. Само за едниот телефон, 071/491-130, во табелата за базни станици е празно, не постои никаков податок. За разлика од бројот на Вања каде има над 2.000 податоци од базните станици. Зошто се проблем моите базни станици, ќе се расчисти со овој доказ кој го барам – рече Палевски.
Во однос на наводите на Палевски дека на цедињата се вршени манипулации и измени, обвинителката нагласи дека мобилните оператори намерно ги доставиле листинзите и другите податоци и анализи на цеде, а не на УСБ, затоа што на цедињата не може да се вршат никакви промени освен како што се изготвени од операторите.
-Во телефонската анализа само за овој број нема податоци за базни станици и тоа добро го знаат двете обвинителки. Во ворд, истражителот Влатко Никовски искуцал податоци за мојата базна станица, а не приложил табели, како за останатите броеви – рече Палевски.
– На страна 12 од телефонската анализа, за бројот 071/491-130 е наведено дека на 27.11.2023 зрачи на базни станици во Скопје и тоа од 10.06 до 10.46 часот на базните станици Железничка станица, Народна банка, Центар. Во периодот од 11.23 до 12.21 часот зрачи на базна станица Млин Балкан. Од 13.21 до 16.21 часот зрачи на базна станица Железничка станица Аеродром. И од 18 до 19.21 часот зрачи кај Народна банка. Значи, има податоци за базни станици за тој ден, а претходно ако нема ние не можеме да ги измислиме – рече обвинителката, која додаде дека анализата е правена врз база на податоците од операторите.
– ОЈО потврди дека анализата ја чита од ворд документ, а не од листа од базни станици од Телеком. Овие базни станици ги бараме токму затоа што во анализата немаат доказ за критичниот период, а го обвинуваат Палевски. Тие немаат доказ каде бил Палевски во критичниот период. Невозможно е само за него во критичниот период да нема податоци од базните станици. Податоците што ги прочита обвинителката се по настанот, по извршување на делото. Затоа бараме овој доказ судот да го обезбеди, бидејќи нас нѐ одбија – рече адвокатот Страшевски.
Судијата Ивица Стефановски рече дека ако се обезбеди присуство на предложениот сведок од одбраната Мартин Панчевски, тој ќе биде испитан на некое следно рочиште.
