Американската претседателска администрација го извести Конгресот во петокот дека ќе ги укине речиси сите преостанати позиции во Американската агенција за меѓународен развој (USAID) и ќе ја затвори агенцијата којашто повеќе од 60 години беше клучна за јакнење на влијанието на САД, испраќање хуманитарна помош но и за влијание врз внатрешните политики на странските држави.
На персоналот на USAID во интерен допис му е укажано дека сите работни места кои не се пропишани со закон ќе бидат укинати во јули и септември. Дописот, во кој увид наводно имала агенцијата Reuters на вработените им го испратил Џереми Левин, вршител на должноста заменик управител на Агенцијата за владина ефикасност (DOGE), којашто ја води милијардерот Илон Маск а чијашто задача е да го намали расипништвото и непродуктивната потрошувачка на американската бирократија.
Левин во дописот навел дека целиот персонал на агенцијата ширум светот наскоро ќе добие електронска пошта со известување дека се укинуваат нивните работни места. Вработените ќе имаат избор дали ќе бидат отпуштени на 1-ви јули или на 2-ри септември, пишува Reuters повикувајќи се на дописот.
Во текот на следните три месеца, Стејт департментот ќе ја презема преостанатата „програма на помош за спасување на животи и стратешка помош“ од USAID, се наведува во меморандумот, додавајќи дека персоналот на агенцијата нема автоматско да биде префрлено во одделот кој ќе спроведува „засебен и независен процес на вработувања“.
Претседателот Доналд Трамп уште на првиот ден од враќањето во Белата куќа нареди 90-дневно замрзнување на севкупната странска помош на САД и ревизија на програмите за да се утврди дали тие програми за помош се усогласени со политиката на неговата администрација. Подоцна беа изнесени податоци дека се откриени милионски измами со големите средства со кои располагала USAID со небулозни фиктивни доделување средства на лица кои би требало одамна да бидат мртви или се малолетни од страна на агенцијата за којашто рече дека ја водат „лудаци од екстремната левица“.
Набрзо по враќањето на Трамп во Белата куќа, DOGE доби пристап до системите за плаќање на USAID и до електронска пошта преку што беа откриени дубиози, беа замрзнати многу исплати и на голем дел од персоналот му беше посочено дека ќе биде на привремен одмор.
Во изјавата на државниот секретар Марко Рубио се наведува дека Стејт Департментот во петокот го известил Конгресот за својата намера да направи реорганизација на USAID, и се додава дека агенцијата „одамна заталкала од својата изворна мисија“.
„Благодарејќи на претседателот Трамп, оваа погрешно водена и фискално неодговорна ера сега заврши. Ги пренасочуваме своите програми за помош во странство за директно да ги усогласиме со она што е најдобро за Соединетите држави и за нашите граѓани“, истакнува Рубио.
Во објава на Х, Џереми Кониндик, поранешен функционер на USAID кој сега е претседател на Refugees International, овој потег го нарече „целосна абдикација на децениското американско водство во светот“.
