Новите контроли на извозот на ретки метали во Кина би можеле да го запрат производството на автомобили бидејќи резервите на клучните метали би можеле да истечат за неколку месеци доколку Пекинг целосно го запре извозот, пишува „Фајненшл тајмс“.
Во април, Пекинг ги прошири ограничувањата на извозот на седум метали кои се клучни за електричните возила, турбините на ветер и борбените авиони, како одговор на тарифите од 145 отсто наметнати од американскиот претседател Доналд Трамп.
Владините претставници, трговците и менаџерите на автомобилската индустрија рекоа дека компаниите, за кои се проценува дека ќе имаат залихи уште три до шест месеци, сега брзаат да направат нови набавки и да бараат алтернативни извори за да избегнат сериозни прекини во производството.
Јан Гизе, трговец со метали во франкфуртската компанија Традиум, предупреди дека купувачите се затечени и дека повеќето производители на автомобили и нивните добавувачи имаат само два до три месеци набавка на металите
„Ако металитее не стигнат до ЕУ или Јапонија до тоа време, мислам дека ќе имаме навистина сериозни проблеми во синџирот на снабдување со автомобили“, рече Гизе.
Овие елементи се клучни за воените системи како што се борбени авиони, проектили и беспилотни летала, како и роторите, моторите и преносите што се користат во електричните и хибридните автомобили.
Еден висок претставник на автомобилската индустрија рече дека ограничувањата ќе имаат големо влијание врз Tesla и сите други производители на автомобили и ја оцени сериозноста на контролите во Кина на „7 или 8 од 10“.
Тоа е форма на одмазда со која кинеската влада вели: „Веќе нема да одговараме со иста мерка на царините, туку ќе ве удриме таму каде што ве боли, па вашите компании ќе вршат притисок врз сопствените влади да ги променат своите тарифни политики“, рече истиот извор.
Ретките земјени метали се широко распространети во Земјината кора, но тешко и скапо се обработуваат на еколошки начин. Кина речиси целосно ја контролира обработката на тешките ретки земјени елементи.
Според новите правила, кинеските извозници мора да добијат дозвола за секоја пратка на ретки метали во странство, а нивниот трансфер во САД е забранет. Сепак, спроведувањето на тие ограничувања, кои постепено се прошируваат на повеќе клучни минерали од 2023 година како одговор на американските забрани за извоз на технологија за чипови во Кина, сè уште не е систематски.
