Постојано во комуникација со граѓаните има еден засилен притисок да се кандидирам за градоначалник на Центар, но се уште не сум ја донела конечната одлука. Сметам дека треба објективно да се гледа на работите, да се направат истражувања, затоа што се наоѓате во еден меур од ваши симпатизери, пријатели, поддржувачи, но веројатно има и една друга страна која треба со време да ја дознаете, а не на избори.
Ако се вратиме наназад и ги погледнеме нашите релации со Обединетото Кралство, треба да се вратиме во 2005-тата кога за време на владеењето на Тони Блер ние го добивме кандидатскиот статус. Со потпишаниот договор, Македонија го засилува своето меѓународно портфолио. Што се однесува до финансискиот дел постојат некои дилеми околу тоа дали сите детали на еден ваков обемен договор ќе и бидат познати на јавноста. На крајот ние граѓаните ќе треба да го враќаме тој долг. Сомнеж во тоа во која насока ќе може да се реализираат проектите е и слабиот капацитет на администрација, не само сега туку една администрација што се руинира години наназад и затоа не знам дали ќе биде способна да понуди, изработи и спроведе проекти предвидени или најавени од страна на Премиерот. Се уште не ги знаеме и деталите и за што ќе се трошат парите од Унгарскиот кредит, вели Софија Куновска во Само Вистина.
