Врховниот суд на САД денеска и дозволи на администрацијата на претседателот Доналд Трамп да го поништи привремениот легален статус на стотици илјади венецуелски, кубански, хаитски и никарагвански мигранти кои живеат во земјата, олеснувајќи ги напорите на републиканскиот претседател за зголемување на депортациите.
Судот ја суспендираше одлуката на федералниот судија кој ја запре намерата на администрацијата да ја прекине привремената дозвола за имиграција овозможена за 532.000 мигранти од претходникот на Трамп, Џо Бајден.
Двајца од тројцата либерални членови на судот, Кетањи Браун Џексон и Соња Сотомајор, не ја поддржаа пресудата.
Привремената дозвола за имиграција овозможува престој во земјата врз основа на „итни хуманитарни причини или значаен јавен придонес“ и им овозможува на имателите да живеат и работат во САД.
Доналд Трамп го отфрли откажувањето на дозволите со наредба што ја потпиша на 20 јануари, првиот ден од неговиот втор претседателски мандат. Администрацијата изјави дека прекинувањето на привремениот правен статус ќе го олесни забрзаниот процес на депортирање на мигрантите.
Ова е еден од бројните случаи што администрацијата на Трамп ги поднесе пред Врховниот суд за да не ги поништи одлуките на судиите што го попречуваат спроведувањето на неговите политики.
На 19 мај, Врховниот суд му дозволи на Трамп да ја повлече привремената заштита од депортација што администрацијата на Бајден им ја додели на околу 350.000 Венецуелци во САД, во исчекување на пресудата на пониските судови.
Во обид да го намали бројот на нелегални гранични премини, во 2022 година Бајден почна да им дозволува на Венецуелците кои влегле во САД по воздушен пат да побараат двегодишна дозвола за престој доколку поминале безбедносни проверки и имале американски финансиски спонзор.
Бајден го прошири тој процес на Кубанците, Хаиќаните и Никарагваните во 2023 година, бидејќи неговата администрација се соочи со бран на нелегална имиграција.
