Преку циркуларно писмо од 15 мај, испратено до сите манастири, Светата заедница, информирала дека од 14 јуни на Света Гора ќе се воведат нови правила, според кои месечно се дозволени до 300 претстои на странски поклоници, а исклучок се верниците од Грција и Кипар, објавија грчките црковни медиуми, јави дописничката на МИА од Атина.
Според циркуларното писмо, новите ограничувања нема да важат за српските поклоници во манастирот Хиландар, за Бугарите во манастирот Зографу и за Русите и Украинците во манастирот Свети Пантелејмон (руски).
Порталот „Ромфеа“ пишува дека новите мерки за странските поклоници, се со цел да се зачува смирувачкиот карактер на Света Гора, по брзото зголемување на бројот на поклоници (главно Романци) во последните месеци.
На почетокот на годинава беа воведени конкретни мерки меѓу кои задолжително доставување барања за посета најмалку ден пред пристигнувањето; ограничен број поклоници во текот на месецот; посета само по одобрена покана.
Сепак, според грчките медиуми, и покрај овие мерки, бранот на поклоници сè уште се зголемува, а за тоа, како што пишува „Ромфеа“, придонесуваат многу агенции за „услуги“ на поклоници, што всушност се туристички канцеларии, кои работат во соработка со индивидуални монаси или манастири и организираат посети за поклонение по високи цени.
Дополнително, порталот пишува дека „многу претставници на Светите манастири го вклучија алармот за можно претворање на Света Гора во туристичка дестинација“.
Новите ограничувања ќе важат од 14 јуни, денот кога новата Свештената Епистасија (Надзорништво) ќе ја преземе функцијата, одлуката според циркуларното писмо е од 15 мај и не е во никој случај поврзана со земјотресот во саботата.
Според грчките медиуми, во текот на 2024 година Света Гора ја посетиле 158.000 поклоници, околу 8.000 повеќе споредбено со една година претходно, а најбројни, веднаш по Грците, биле поклониците од Романија.
