Шведска се подготвува да изнајми затворски објекти во Естонија со цел да го реши проблемот со пренатрупаноста во своите затвори, пишува Гардијан.
Според договорот со Естонија, што беше потпишан во јуни, Шведска ќе добие до 600 места во затвор во балтичката земја.
Министерството за правда објави дека веќе ѝ наложило на шведската затворска служба, Криминалварден, да ги подготви потребните чекори за спроведување на програмата.
Се очекува договорот да стапи во сила до летото 2026 година.
Овој потег доаѓа во време кога бројот на затвореници во Шведска постојано се зголемува.
Најновиот извештај на Одделот за кривични истраги предупредува дека бројот на затвореници би можел да се зголеми од 7.800 на дури 41.000 до 2034 година ако продолжи сегашната политика на изрекување казни, која се фокусира на построги казни, а не на рехабилитација.
Според шефот на шведската затворска служба, Јоаким Ригамар, шведските затвори се во „кризна ситуација“ поради пренатрупаност.
Особено загрижувачки е бројот на деца кои се соочуваат со долги затворски казни.
Трендот се должи на промената во пристапот, што доведе до тоа деца на возраст од 15 години да бидат осудени на 10 или повеќе години затвор за сериозни кривични дела.
Според договорот со Естонија, Шведска ќе добие капацитет за сместување до 600 затвореници во естонските затвори, но експертите веруваат дека ова решение нема да биде доволно во однос на потребите, со оглед на предвиденото зголемување на бројот на затвореници во наредните години.
Министерот за правда Гунар Штремер нагласи дека договорот со Естонија е важен чекор во ублажувањето на моменталната состојба во шведските затвори, но додаде и дека ќе биде потребна „внимателна подготовка“ за сè да функционира правилно.
