Министерството за финансии денеска објави дека успешно е завршена исплатата на главницата и каматата за првата граѓанска обврзница, издадена во јули 2023 година. На сметките на 1.448 граѓани се исплатени вкупно 1,4 милијарди денари, што изнесува околу 23,5 милиони евра, како и камата во висина од 72,4 милиони денари (околу 1,2 милиони евра).
Оваа обврзница беше првиот финансиски инструмент од ваков тип понуден од државата, наменет исклучиво за физички лица, со цел да им се овозможи на граѓаните директно учество во финансирањето на државниот буџет. Таа беше издадена со рок на достасување од две години и каматна стапка од 5% годишно, што значи дека исплатата на каматата се реализираше во два наврати – во 2024 и сега, во 2025 година.
„Ова е првпат државата директно да се обрати кон граѓаните како инвеститори, што претставува значаен исчекор во развојот на финансискиот пазар во земјата. Тоа ја рефлектира зголемената доверба на граѓаните во фискалната политика и финансиската стабилност“, стои во соопштението на Министерството.
Целта на воведувањето на граѓанските обврзници е повеќеслојна: зајакнување на домашниот пазар на хартии од вредност, поголема вклученост на граѓаните во инвестициски процеси и создавање стабилна и диверзифицирана инвеститорска база. Притоа, се нудат стабилни и предвидливи приноси за граѓаните, во време кога банкарските камати често се ниски или неповолни.
Од Министерството посочуваат дека интересот за обврзниците бил над очекувањата. Освен првата, државата досега има издадено и втора граѓанска обврзница, на 7 ноември 2023 година, во износ од 17,6 милиони евра, која ќе доспее во ноември 2025 година. Со двете емисии, вкупниот обем на вакви обврзници достигна 41,1 милион евра.
